السلام عليكم ورحمة الله وبركاته
كواكم الله يا وجوه الخير.......
اخوكم عيفان نابت الزايز, بزايز الكرة الارضية وبتلفات الله وديره مابيهه غير هوه وعجايه والله فوكاهم ! وهذا حاله مو جديد عليه لان من هوه صغير لكه حاله ابزايز ديرته ومن ذاك الوكت بده الشكه والتعب , الشكه والتعب والضيم من مايلكه ماي يسكي شلباته ومن يصل الماي بطلعان الروح بالرشن يصل الطين للرجب وتشهك روحه من ينكسر الربد بعز الظهرية , الضيم من ينصاب ابلهارزيا مثل الورد والتيفو تعدى مرحلة ضيف دائم وصار من اهل البيت,وجف ايده تكول بعرض شارع اربع شوارع والسمرة مال وجهه تشوي شوي! الضيم من يشوف اصدقاء طفولته يلعبون ويمرحون وهوه يلعب بـ تركتر ساعة يكرب وساعة يعدل وساعة يمرز! واذا باك من وكته لمله جم جاهل وجاب جاروبه ملاهه جياس وخرك وكام يلعب طوبه الين اللعبة تنتهي بجدمة واحد من اصابه وغالبا الاصبع الجبير كون الكبر بدون عرفه !
اخوكم عيفان ما ضل صغير والعمر يمشي ومارضه بالبزايز, بزايز الحال والواقع وزاد طموحه وكدر يوصل لبزايز الكرة الارضية ويروح ويرجع ومشى حاله بفضل الله المصيبة انه من يرجب المهجومة الي اسمهه طيارة هم يلكى روحه بالبزايز وكاعد بجعبهه ومن يمشي بالممر يدورعلى رقم المقعد تلكة كل ركاب الطيارة وراه واكفه تنتظر شوكت يفرجهه الله على عيفان ! الا ذاك الرجال هوه هم من نفس الديرة كاعد بالدرجة الاولى وسالني ها خوي وين مجانك وكال خوما كاعد بخانة الشواذي ! ايباااه من هجم بيته ذكرني بخانة شواذي اللاندكروزات موديل السبعينات الي جنه نرجبهه من السوك لبزايزنه ! اخوكم عيفان تعلم من الدنيا واخذ دروسهه وقرر المرة الجاية الا يرجب درجة اولى ! وجن صارت صدك وكعد اخوكم بصدر الطيارة وما صار اي تعطيل للناس ! الا صدر الطيارة يصوصي ما بيه غير انه الاسمر و واحد اشكر وعيونه خضر مبين عليه مو من البزايز ما يرادلهه روحه للقاضي ! الصدر بيه التعامل غير شكل من المقاعد للمضيفة ! الا هذا الاشكر بنص الطريج وصاح علـى المضيفة وكللهه شوفي اكلج انه اريد اروح يم الدريول بالكابينة وانه هماتين طيار وهاذي هويتي عطيه اياه والمكرودة ماصدكت خبر راحت يم الدريول و وراهه صاحت ابو عيون خضر وراحو سوه بالكابينة واخوكم عيفان تباوك عيونه ويباوع وضحك وصور وعلكت, الا اخوكم كام يتكرضم ويلوب خايب انه مو جاعد بالصدر لو ربي غير واحد !
وضمهه عيفان وكال هاي ما فوتهه , وصل للديرة البعيدة ونطر بيهه اسبوع و رجع وهماتين بالصدر الا هالمره وحده محد وياه ! والضميمة مالته مازالت نابتة بكلبه وقرر ما تفوت و صاح على المضيفه وكال الهه شوفي اكلج انه اخيج عيفان وصاعد بالصدر مو ابلاش واريدن اروح يم الدريول بالكابينة وهذا الكارت عطيه اياه ( عيفان عنده كارت تعريف بسمه ومسويه عاج مو حي الله كارت ) البنية راحت وجت وكالت خويه انت من يا ديرة ؟ كللهه انه من ديرة هذا الجواز الخضر وراحت ورجعت وكالت الدريول يكول ما ترهم انه اعتذر القوانين ما ترهم , عيفان تبسم وشكرهم لاكت هوه ابداخله يغلي غلي وافتهم القصد الشغلة شغلة ديرة البزايز... الي هالايام صار اسمهه يخوف !
سالفة البزايز الهه رباط ويه ديرتنه .. صارت بالبزايز يا الربع , الي اكثرنه يعرف سالفتهه لاكت خلينا نحجي واقع ! احنه يا وجوه الخير جنه بالصدر من ايام جدنه حمورابي وانت جاي الى ان اجانه مدهور ودهرنه وردنه بذيل القضية .. وهاي ايدي اكص جفها لا والله من الجتف اذا صارتنه جارة ..جنكم ما دريتوا غير احنه طلعنه دايحين و ماندري برواحنه .. مطشر عسن يبقه مطشر ولا التم كالها بلسانه والباقين تره هم رايه بس ما يحجوها يخافون اظن لا يروحون ينذبون زرك بالبزايز .
... كافي بزعنه من اليشن والطناطل ال يسرحون ويمرحون بينه .. نريد نرجع بالصدر واحنه اهله ..موش تمام لو آنه غلطان ومبزبز !
وسلامتكم
ملحوظة: قصة عيفان عند التوطئة حقيقية !
معاني الكلمات:
البزايز: مصطلح يستخدم عند الفلاحين ويقصد به الاراضي الواقعة عند مؤخرة الانهر والجداول
دريول : سائق
الرشن : ميعاد وصول مياه الري للأراضي
اليشن : مصطلح يستخدم في مناطق الاهوار كدلالة لبقايا اثار من سكن تلك المنطقة , قامت على رقعتهاحضارات قديمة تعود إلى العصر البابلي خلال المدة بين 1850-1530 ق.م ولا تزال آثارها وسط مياه الهور وقد قامت عليها مساكن عرب الهور.
منقولة بتصرف
رد مع اقتباس
المشاركة الأصلية كتبت بواسطة بدر العراقي
