ضيعت العرف لو ضايع العنوان؟
يالخفيت جدمك وانه حملي ثكيل
ضيعت العرف؟ لو ضايع العنوان؟
قراية فاتحة ينطيني كلمن جاي
ويدعي ..فراك ولفك خاتمة الاحزان
بصفنتي,بغيبتك وكفني بين اصنام
واتحداك تعرف ياهو بينه انسان
عشكتك..وانه عمري..(مااتذكر زين)
بوكت..بي توني قاري (البلبل الفتان)
وفاركتك قبل..يمكن سنه وجرحين
من عدها وضعت..جيله بعرس معدان
انكطع حتى الهوا ..وضليت اعكدة بخيط
واجرة لصدري..ويطيح النفس خدران
عفتني ابحدي ..وجروح الحلال هواي
بسعر ماي..انبعت يم ام ولد غركان
انه سامع جهنم بيها سبع انواع
ووحده بصدري مامذكورة بالقرآن
واذا تحضني هسه يطيح مني رماد
ومن تاخذلي صورة تشوف بس دخان
وبعد لسعة شمس ويعطب المحصول
وتندك (نخلة سودة) استشهد البستان
اعرفت عمر الشجر من دون طكة فاس
وسبب فركاك حاير ماعرفته شجان
طحت بفراش موتي..شوكت اطيحن بيك؟
حرت مثل اليدور الشامه بالسمران
ثكل وزنك عليه والطعم للغير
يعشرة سوك ..بيك شحصل الميزان
غريبة الناس..مدري انه الغريب اطوار
وأورث مشتهاتي بجمرة الحرمان
واذا ابدل المخده يطير مني النوم
عجيبه شلون يغفه البدلوله احضان؟
وانت شلون عايش؟؟ والله افكر بيك
الدخلوا بعدي الك مافروا الديوان
ويه المو ...اصيل العشرة ماتنراد
وخذاك..المايميز الكاس والفنجان
يبذرة برحي,وانطميت جوة الكوخ
اضل متاني طولك يخسف البنيان
بخلك مرايا...واضحك للضحك وياي
وسواد البالظهر تارس كفاها احزان
يردلي الشوف بس رد من قميصك خيط
الف يعكوب بيه وطلتك قمصان
انه متاني الشمس تمطر علي فياي
واهز غيمة هلاهل بس اريد لسان
وأرد ارسم نهر,,,,والروجة كذلة ماي
وأمشطها اببلم ,,يم جرفك النعسان
وافوجن بالبحر...وآخذ متاعي زنود
عكب هذا الغرك..ماأمن بسفان
ومااصعد سفينه...هسه لو مو نوح
شحلاته الموت ويه الناس بالطوفان
هم برجعتك خاف الليالي تطول
ويموت التحبة وتلكة غير انسان
رد مع اقتباس
