هنا

[تشيللو]

بعدين نبني جسر

اتمنى عدنه شعب ما يقبل بموته

واتمنى عدنه

كَمر ما تاكله الحوته!!

اتمنى اصحه الصبح ألكَه عله بابي ورد!!

ومن امر بالسيطره..

تارس جيوبي برد!!

وماريد ساعد قوي..

ولااريد جرحك نسر

ممنوع يبچي طفل كَلب الوطن ينكسر

ممنوع زينب بعد.. توكَف بحضرة شمر

كافي دمار وقتل مو خلص حتى السدر

انريد نبني وطن؟؟

نحتاج نبني فكر.. يستوعب المطرقه

بعدين نبني جسر!!!

يذبحني منظر طفل امزكَه ثيابه

اخيالته من كَصب..

ويصيح نحن (العرب)..

وسلاحه نشابه

لو راد يلعب .. (عرك)

يرسم سواتر وهم

ويترس الكَاع بجثث للخاسرين الحرب

بس همه نفس الجثث بالواقع اصحابه!!

ويعجبني منظر طفل مرتبه ثيابه

من كثر حب الوطن - حط روحه بكتابه -

اتكَول چنه نبي وساجد بمحرابه

اشكَد عنده طيبة نفس ويلاه .... يايابه!!

من زغره ابوه منتبه.. معتجب بآدابه

من يشتكي من العطش..

ما يشرب ويكتفي، ايشرب اللعابه!

يمشي وي ابوه للحقل..

يشتل مروءه ومُثل..

ويترس شليله فرح ويوزع احبابه

يرسم طيور.. ومطر..

ويغسّل من المطر..

ويرسمله كوخ ونهر، ويمدد بـ(بابه)

يطلب هديته ورد لو نجح بالمدرسه

ما يطلب من الاهل

جيبولي دبابه!!!

[حيدر الطائي]

كلمات جميلة جدا
يسلم هالذوق

[المستبده]