شوكت تتحقق الوحدة العراقية
ردلها الأمان وردت الها الروح
ورجعت من جديد الحلوه ضحكتهه
أريد اضحك واصفك واشعل شموع
وأريد أبجي بفرح بدموع فرحتهه
يا أم العواصم أنتِ يا بغداد
يا دار السلام والشرف سمعتهه
محتار بوصفها شلون وابدي منين
وهي أحله المدن لعيون شافتهه
وهي أول حبيبة الي بهذا الكون
وهي أول عشگ عالدرب مشاني
شگد حلوه گبل گالولي عنها أجداد
ومنها بكل مدن ماتلكه ابد ثاني
بس هسه الحلاوة تضاعفت بهواي
يعني أصل الجمال الأصل رباني
آني أحجي نعم اي أحجي عن الراح
بس أرجوك أبقى وياي ظل تاني
يگولون العراق جثة وأكلها الدود
وگالوا طائفية وذبح هم ثاني
وك عمر الوطن ما جان جثة وموت
ولا بهاي السهولة وكف ويعاني
صح جان الوطن من كل جزء مجروح
بس طابت جروحة ورجعت ألواني
عمران وشوراع والورد مفروش
و بنيان وحدايق بيها بغداني
وجزرات وشجر يا محلة الطيور
يا محلة النهر يالدجلة عنواني
وحق أسم العراق بغداد تبقى بخير
وحق ربي ونبيه وحق قرآني
إتناسه الحزن أرجوك وأنسة الراح
ولا ترجع بعد تحجيلي من ثاني
قتل تفجير جثة وراس مذبوح
گبل جانت گبل بسنين شدتنه
أخوان ونظل عگال فوگ الراس
متحدين كلنا وهاي خوتنه
أنواع المدن كل أحنا متخاوين
دهوك ورمادي وياها بصرتنه
هذا رافضي ومن يمته هيج انكول
واذا الشيعي وكع ركضتله سنتنه
وذاكَ ناصبي وشلون هيج انگول
واذا السني أنجرح فزعتله شيعتنه
تركمان وعرب وأكراد ملتمين
بمسيح وصابئة وإسلام قوتنه
وعلى أرض الوطن نتمشه أيد بأيد
شمال او وسط وجنوب ديرتنه
أيد بأيد ولتكريت كلنا نروح
ونعبر عالسماوة هناك كعدتنه
ونطلع للرمادي نبات يم دليم
ونرجع للنجف ونزور حيدرنه
ونختم هالزيارة هناك يم بغداد
وللنعمان كلنا نروح نتعنه
ونعبر عالجسر نتوجه أحنه النوب
ويم كاظم الغيظ أنتم زيارتنه
رد مع اقتباس
المشاركة الأصلية كتبت بواسطة star light
