شفتك تمشي وي غيري وبچيت دموع
شفـتك تمـشي وي غيـري و بچيـت دمـوع
و لان كلش اغار او واگع بحبــــك
هو الـ يحبك فرض هيج يغار
اگص جدمه اذا غيري مشه بدربك
دباوع لحظه ليه و حن علي فد يوم
رايد نظره منك ما ردت گلبك
حبيتك ذنب بس گلت اظل وياك
خل تحرگني نارك قابل بذنبك
منك غارت النجمه و شمس الغروب
و يتمنى الگمر لو يگعد بگربك
و بقى عطر الورد من ريحتك مسطور
صدگني الورد يشم عطرك
و تريد اني اقاوم هالجمال البيك
لك انت المؤذن يسكر بعطرك
يجي حتى يأذن بس يصيح الله
ينسه اكبر و يصيح (( الله يا حبك ))
تمشي و بخصرك تميل و نميل وياك
و اذا بحجاره تعثر ننگلب گبلك
تشيل اللفه تاكل .. بس تصل لشفاك
اثاري اللفه هي التاكل بشفتك
تعاملني بقساوه و تدري بيه اهواك
و اعاتب گلبي و اگوله السبب من عندك
و اذا مره حچيت .. و ما حچيت وياي
اگص لساني اگولن يمكن مزعلك
و صح گلبي يتسودن من يمر طاريك
و صح العقل يمك و الفكر يمك
بس خليني احذرك لا تتعده وياي
و لتگولي تذلني و اقبل بذلك
بس غير الكرامه شما تسوي يهون
و اطلعلك اعذار و اقبل بعذرك
و اذا تطلع فتاوي تكفر اليهواك
اول واحد اني .. الواگع بكفرك
و اذا حبك ثلج راضي احضنه بكانون
و بتموز قابل اكل بجمرك
دعيت الله تحبني و انت ليه تصير
و سهرت الليل اسجد و اركع لربك
سراج
رد مع اقتباس
