ليش ما نصير مثل مصر .. اني اكولكم ليش :
1 - نسبة جبيرة من العراقيين يصدكون الاعلام الحكومي .
2 - نسبة جبيرة من العراقيين يعتقد بان مكون معين يريد يقتص منه ، المكون الفلاني يخاف من المكون الفلاني . هذا يصيح مقابر جماعية وذاك يصيح دريلات وسجون ..
3 - الجيش مو سلطه وحده وانما تابع للحكومة ، روح يمنى روح يسرى .. بالاضافة الى انه 70 بالمية من افراده وضباطه مو كفوؤين ودمج من الميليشيات ومكبسلين وهواية شغلات ..
4 - رئيس مجلس القضاء الاعلى تابع للحكومة ، ( اعدم فلان ، طلع فلان من السجن) وعادل محسن اكبر شاهد ودليل ..
... 5 - عادي جيرانك ينكتل اهم شي مو انت ولا احد من اهلك ، يعني احنا انانيين .. ننقهر ونبجي ونكول حداد بس بنفس اليوم نضحك ونتشاقى ونسكت ..
6 - الشباب منظمي هيج تظاهرات مثل مال مصر اصابهم اليأس ، من ورانا احنا .. من يريدون ينظمون تظاهرة يتهموهم ( بعثية ، تكفيرية ، يريدون اعادة النظام السابق ، طائفيين ) والمشكلة الناس تصدك .
7 - بعض السياسيين يستغلون التظاهرات ( امر طبيعي من يكون السياسي خارج الحكومة بس من هو بالحكومة هنا لازم ينلصم ويسكت ولا يبيع وطنيات ) ..
8 - كلنا نصيح نطلع بالتظاهرات بالفيس بوك وبالكعدات ومن تصير صدك ، اهو يمعود حارة مابي حيل هسه قابل شراح اسوي اني .. اكو هواية راح يطلعون غيري ..
9 - تظاهراتنا اغلبها دينية ، والتظاهرات الدينية بعد مليون سنة ما تنجح .. لان رجال الدين بالعراق من يدخلون بشغلة يخربوها .. حشا شكم واحد
10 - اذا طلعنا تظاهرة فاهم شي ندور غدا .. التظاهرة بدون ثريد ما تنجح ..
اكو هواية اسباب اخرى ولكن هاي بالنسبة الي اهمها .. 330 شهيد وجريح البارحة بالعراق !! وخلونا كاعدين ننتظر دورنا والله كريم ..
لماذ هذا حال مجتمعنا .. لماذا هكذا دمائنا رخصية ولاأحد يحرك ساكن
لامواطن لاسياسي لاحزب لامرجع لا رجل دين لا استاذ لاطبيب لا.....
هل نحنُ شعب جبان أم متلون أم لانمتلك شجاعة المصريين ..!!
أتمنى أن نجد جزء من الحلقة المفقودة ..؟؟؟؟
رد مع اقتباس
