هنا

[ريتاج الطائي]

عله انقاض الدمع رممنه الخدود
وواعدنه الضحك بس ما لگانه

ماندري الفرح بس لهل القصور
لذلك يعتذر مامر واجانه

وما ندري السبب و بينه لو بيك
وضّح يا زمن وبكل امانه

مسجون الصدك كدام العيون
والچذاّب شو طالق عنانه

يعني احــنه غلط جي فقره والعوز!
مثل ظلنه صفه يركض ورانه

لو يمكن قــــــدر نرهم عالاحزان
وصاغ النه الدمع حد ما عمانه

ومن فضلك بعد نحتاج تبرير
ليش الطيبه محسوبه مهانه ؟!

نلزم سيف حتى انصير وياك ؟؟
ونعوف الورد غافي بمكانه

ونلغيهه المشاعر والاحاسيس
واذا فز الضمير انسد اذانه !؟

ومانحچي بعد مثل التماثيل
ويخون البشر گلبه ابلسانة

عذابك يازمن بس گول ليوين
تعبانين من يوم اللفانه

ونسأل يا هلي ليش المعاناة
في قاموسكم توجد خيانه ؟!

من عدكم عرفنه الطيبه والخير
چاليش الزمن قاسي معانه ؟؟

نرجع للدمـــــــع ونبيع الانقاض
وكالعاده الحزن صفقه اشترانه

وشكراً للدمـــــع بس هو وفـّـاي
شريف ومانكر اصله ونسانه

[علي الازيرجاوي]

موضوع في قمة الروعه

لطالما كانت مواضيعك متميزة

لا عدمنا التميز و روعة الإختيار

دمت لنا ودام تألقك الدائم