الــــــــــــــــــزعـــ ــل ...
كللهم رجعنه والزعل راح
خل يفرح الحبنه ويحزن الغير
شجره احنه انبنت بغصانه احلام
وعيب الزعل زحمه امن العصافير
رجع ليل المسامر والسهر زاد
نسهر لحد ما تغفه النواطير
نسكر .. بالضحك ودموعنه اتسيل
نضحك مدري نبجي الوادم اتحير
اشعدنه اويه الزعل واحنه ابلا اكلوب
نخاف امن الهوى ايتعب النواعير
وخاف الكاع تزعل لمن انروح
حتى بحلم هم مانقبل انطير
بتواظعنه السبب لاحتنه الاجفوف
الشجره التنحني اتكظهه المناشير
الرسمناهم حلم بعيونه ايعيش
بحقيقتهم جرح بضلوعنه ايسير
تشوغ ارواحنه ومانلفظ الاه
نخاف اهاتنه اتغث البسامير
مكتوب ابكفانه اصحاب للبيع
اشما تدفع اخذ شايف الف خير
باعونه وتصيح اكلوبنه شلون
نمشي ابلا وداع الربع ميصير
احنه الباعنه مانزعل اوياه
شلون انزاعل البفراكنه ايحير
اليموت وكلبه شايل غيظ عالناس
مثل زفة النهبت موتته اتصير
بس المشى وكلبه ابلون الاغيوم
ابتوديعه السماء امهدله اتسير
خل كلبك الناسك بحر مفتوح
وبنفس الوقت لسرارهم بير
ولاتظلم اشفافك بيهه ضحكات
اطيور الفرح خلهه بشفتك اتطير
ولتشكيلي الغدر والوكت والعوز
ماحبهن .. واحبك لوكلت خير
للشاعر " صباح العتابي
حصريا لدرر العراق
رد مع اقتباس
المشاركة الأصلية كتبت بواسطة إليا
