رسالة وسؤال ..
___________
ماي اجروحنه من الكاع ماتلتم
تعلم ياعلي .. لوبعد ماتعلم
تره جرحك تناسل عبر علتاريخ
جرحك ماعبرنه أبروسنه اتعمم
اسئلك ياعلي .. ونته اكبر من الصار
شكل أدم .. جرح لو .. موت اكل أدم
شكل أدم .. بشر .. لو أكل بذرة خوف
من شجره .. اصلهه من منابع دم
بسمك ياعلي .. لا ..ياعلي محشوم
أبعض الينتمولك .. كمنه نتوهم
نصيحه الدين كالوا.. هسه صاير خوف
وصوت الله وأكبر .. كام يتلعثم
ورهبه من الترب .. من كلشي يرضي الله
من لون المناير .. كلشي صار أظلم
ودخان المخيم .. لبس وجه الاه
وخيم علوطن دخان المخيم
وحواجز .. علصلاه والصوم والتكبير
وحواجز .. علصدك والعدل والبلسم
وموت يدلي موت .. واحنه المتيهين
عافانه الأخوه .. والخال وأبن العم
ومايشبع أمخدر ياعلي المحراب
وابنادم .. يصلي ويذبح ابنادم
