حمل الشوك
الدرب كلش طويل وحمل شوكي اهواي
مثل حمل اليتامة الشايلة العبرة....
مثل حمل التحطب جاية امنبعيد.
من تستغفر الله وبالكلب كفرة...
مثل شوك الشريفة الي تحب بسكوت
من تذكر ولفها وتطلك الحسرة
مثل شوك اليتيم العمرة ست اسنين
من يشتاك لمة وعبرتة بصدرة
افشل من الاكي الناس عين بعين
مثل فشلة الصحرة الماحوت شجرة
اصفن عل دروب البيها مر طاريك .
مثل صفنت يتيم الماخذو سفرة .
اشرب كاس هجرك واستلذ وارتاح.
وارد واستغفر الله امنل سكر وبرة
عاشرت المساجد قررت انساك
روحي بمكة طافت وشتهت خمرة
ردتها احلامي بيك تصير ورديات
سيف الهجر كصها تحولت حمرة
نخل احلامي دنك مستحي منل صار
طاح التمر كلة ومابقت تمرة.
وي طلعت شمسنا الناس من تفوت
يلكوتي بطريقك واكف واقرة ...
اراجع ياكلام يعجبك امنتفوت...
واصب بذنك كلام الماي بالجرة
ليش بلا ضمير تغيرت وشجاك
تغدرني وتخون وتكطع العشرة
شنهو المالكيتة وعندي ماموجود
لو قطرة الكرامة وطاحت القطرة ؟؟
تهجرني وتروح اتوسلك وتعود ..
استاذ بعذابي وتمتلك خبرة
من المفروض اخذ عبرة من الفات
بس اني غشيم وماخذت عبرة..
رد مع اقتباس
