وكع وكت البرد ودفه بيك الغير
ومالحك بعد وستانس بنارك
يلمثل النخل شامخ شجاك شبيك
خليت الغريب ايلوذ بكتارك
مرات النخل بس ينصعد ينباك
وانته بيوم عرسك كلي شخبارك
صدك تمرك خلص لمن اجاك الليل
صدك سعفك خدر وطيت جمارك
دليته على روحك ما تعب وياك
ما دور عليك وداخ فجارك
وحجيلي بعد هالغيبه كلي اشصار
وحجيلك اسراري وبيهه نتشارك
لان تدري كبل كل انه اصير اضماد
اذا شريان صوتك ينزف اسرارك
صغت روحي جرف حدما حضنتك ماي
وبقه الاخر نفس بالروح تيارك
يا اعذب نهر تعله على جرفك ليش
تره الناعور غشك لمن اختارك
واعرفك فكرت ضنك تلوح الغيم
دشوف الوين وصلت روجة افكارك
ذنبك امنت من شالك الناعور
رد اردود بيك وعالجرف دارك
مادامك اجيت وتنشد على الحال
بعيونك تعال وشوف اثارك
كل ساعة انذبح من عرست لليوم
وكل ساعه انسحك بجدام تذكارك
رد مع اقتباس
