شمشتاگلك يابو العيون المايطَيحن كحله
مخليني مثل الظل عدل وحده ويموتون اهله
هسه انتَ ما رايد تجي خليني اچذب ع الخلگ
مو ياهو ليسألك علي وتگله ماارجعله
شسويت بيه بفرگتك ؟
يميزوني كمت من الوجع دمعة يتيم بحفله
عندك علاقه ويه الدوه ؟
تكرهني وموصي علي
جربته كله بغيبتك والعلة نفس العلة
غرگان وانا بغرفتي والماي ماطخ ثوبي
مااختلف ع البالجرف
بس هو مخنوگ بنهر وانا بصور محبوبي
من ﭼـنت اجرحك تقترب معجب ﭼـنت بأسلوبي
واني ادري ليش تغيرت
جامد وماانحب صرت من صلحيت عيوبي
وكل الرسايل خلصت وديتلك حبر ابيض
امسح الغثك واقتنع زين انت بس صوج الحظ
وارجع ...ارجع واذا عودي كبر
لتگول متعافي
ترى مرات من كثر الوجع جتف البنادم يعرض
وتسولفهم ع الوفه وانا ابو خددود الثكله
ايبين صدگها من الـﭼـذب الاحباب لمن تفترگ
واحد يخبل ع الهجر وواحد يخوف شكله
شگد ناس تانتني ومشت
الماي صبح غيم واني انتظرك
رادوني روجه ومارحت وابقيت ملح ابَرك
يـ التارس ضلوعي فشل
شگد ﭼـنت محتاج انحضن من باوعتلي بظهرك
بين الگلوب الفارگت لدروب شمرة نيه
بس انتَ شيجيبك علي
بلشوگ ماعندك عرف خاطر تهم بـ الجيه
البلبل المتربي بقفص
مايغث روحه اعله الغصن مافاهم الحريه
شناقصني ماادري!
المهم بجفاك اليباوع علي من كيفي احس بلفشله
امفشلني مثل الـبالحرب
يجازونه حسباله بنصب
تاليها بديار الغرب ..حاير يظل بالبدله
امن الدنيا طبيت اشتري وشفتك وماگلت السعر
بكلشي شتريتك بلندى بروحي بصفار اوراقي
لگطه وركض بيك اركضت وباقيلك تصيح علي
بس اني من كثر الفرح ماخذت منها الباقي
يَمدَني روحي اعله الگبر
جيتك مَحمل عافيه ورديت بس بخلاقي
ومن بعد كل هذا صرت وحداني؟
ودوله اليمدحوني گبل صحبانك وصحباني
مابيهم الگلك شلون اتخونه؟
الخلاك تنسه مرايتك وتمشط اعله عيونه
بس هو موصوجك ترى؟!
الگلب يتمرگص ع اليأذونه
ياگلبي دگلك ثايه
الوادم تراها تشيطنت يلنيتك مصلاية
مثل وياهم من تحب واحسب الكل حـﭼـاية
گلهم نمت من العصر
مشغول والگالك عذر
اللملهوفلك گله نتظر
بس تضعف يعوفك ترى اليركض وراك هواية
وانتَ ...انتَ ويه ربك عايفك
رب..ويحن ع العايفه موعلى العايف خله
شيسامحك واني انتـﭼـي؟
مارجعَتني امشي عدل عملة فراگك عملة
يومين حاسبهن وانا
ماﭼـن اعرفك من سنه
جنك بالاول صاحبي وگاضيها نفس الرحله
شمشتاگله يابو العيون المايطَيحن كحله
