لما باذن الله ربنا يفك عقدتك .. وتتخطبى .. فإليك نصائحي حتى تأخذي بخطيبك من مركب الخطوبة الِّلي محدش عارف هاترسى على إيه .. إلى مثوااااه الأخير في قفص الزوجية السعيد ..
أجمل ما في الخطوبة العزومات الرومانسية .. على أحلى محلات أكل في البلد .. واللي عمرك ما هتشوفيها بعد الجواز .. المهم نصائحي لك عند أي عزومة مع خطيبك…..
1- الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا من البوز زي الخنجر ولا من فوق طبعًا .
2- العيش أوعي تفضحينا وتقطعيه بسنانك .. ولا الرغيف نصين بأيدك وكل نص لقمة وتحشري .. أوعي .. العيش بيتقطع بالسكينة في الطبق .. وبعدين تاخدي لقمة .. لقمة .. بالعافية .. قال يعني نفسك مسدودة .. اضغطي على أعصابك جدااا . وبعدين لما تروَّحي.. إبقي كلى زي مانتِ عايزه….
3- الشوووربة .. أبوس ايديك .. بند الشوربة ده مهم جدًاااا .. الشوربة تتشرب من غير صوت خالص .. ومن غير ماتقعدي تنفخي فيها .. زي القهوجي اللي بينفخ في الحجر .. وطبعًاااااا عايزكى تنسى تمامًا .. السلطانية اللي بتقيميها على بقك في البيت .. وتدلدقي على روحك .. وبدون صوت .. سخنة ولعة برضه بدون صوت .. وتسيبي تلت الطبق ع الأقل ..
4- الرز طبعاً .. بيتاكل بالشوكة .. أوعي إيدك تتمد ع الملعقة
5- المكرونة .. الاسباكتي .. برضه بالشوكة .. تتلف على طرف الشوكة .. لحد ما تخلص وبعدين تحطيها فى فمك من سكات .. مش تشفطي المكرونة عود عود ..
6- السمك .. مشكلة .. شوفي ..
بتفصلي اللحم عن الشوك .. إزاي .. ؟؟ تقطعي اللحم من النص .. بالطول وبعدين تفردي اللحم ع الجانبين ولما تخلصي ناحية .. متقلبيش السمكة .. شيلي السلسله بالشوكة والسكينة , وحطيها ف جنب الطبق وكملي أكل النص التاني .. وبدل الفيلم الهندي ده .. نصيحة .. ماتكليش السمك خالص .. قولي مابحبش السمك وخلصي نفسك ..
7- الجمبري .. -إذا كنتي عارفاه – .. أول ماطبق الجمبري
ينزل .. بصيله بقرف واحتقار شديدين .. آل يعني زهقانة من كتر أكل الجمبري الجامبو ف بيت بابااااا .. وأتنهدي جامد وقولي .. برضه .. ؟؟؟ وتروحي قاطعة راس الجمبريياية .. بالشوكة .. أنا ف عرضك إنسي المصمصة دلوقتى ..
8- البطاطس سواء مسلوقة أو محمرة .. أوعي تهرسيها وتدبيها ع الرز وتبدي .. لا .. لآ .. لآ .. بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي ..
9- الفاكهة .. لو الفاكهة فيها بذر .. طلعيه من فمك وحطيه فى إيدك وهي مقفولة .. وبعدين ف طفاية السجاير اللي على الترابيزه .. أوعي ياحبيبتي من نظام التفتفة للبذر .. إنسي ..
10- ولما تخلصي أكل تحطي إيدك على بطنك .. – اللي عصافيرها بتصوصو من العينات اللي كلتيها – .. وتقولي له مش ممكن .. أنا عمري ما اتفجعت كدة .. أنا قدامى أسبوع .. هابطل أكل فيه ..
وبعدين تمسكي الفوطة اللي دايمًا موجودة على التربيزة من غير لازمة .. وتبوسيها .. آل يعني بتمسحي بؤك ..
وبعدين تستأذني منه لدخول التوليت لإصلاح ماكياجك .. وتخشي التواليت وتطلعي من شنطة إيديك .. لفة الفول والطعمية اللي جايباها معاكي .. وبالهنا والشفااااااااااااا
رد مع اقتباس
