عندما اسافر
بين احلامي والذكريات
يغضب الزمان
فيصلب جروحي على الواح الحرمان
لكن رغم ذلك
سأنتظركَ
......................
اتاني لشوفتك واتنطر لملگاك
والم دموع عيني وسكته أبجيهن
وأكلبهن اصورك والعتاب يطول
وأشعلهن جروح وارجع اطفيهن
من يوم الرحت خلفت بيه جروح
من يمرني اسمك مجبر ارثيهن
عاگد عله جروحي راية العباس
اذا هادن دقيقة بنار اجويهن
واشربهن ملح حد ماينزفن ليل
وعله نار الدمع حفاي امشيهن
وأخيطهن بوني البجه حتة الناي
وأفتگهن وارد انوب اناغيهن
وأذا شامت يمرني .. بيدي المهن عود
والحنهن وارد بسمك اغنيهن
ويطلبن دواهن وانه عكس الناس
اشگگهن لحد مابيه اساويهن
مو ذله من أگلك بيه كومة جروح
بس هنه سوالف لازم احچيهن
يتنطر جيتك وگفن اعله الباب
هذن جروح الك مافكرت بيهن ؟؟؟
رعد الفياض
رد مع اقتباس
