معاناتج جبيره وعمرج ازغير
وحالج هذا اكبر منج اسنين
بحضن امج كعد واتربع العوز
واشوفج كاعده بحضن الكراتين
متوظفه بزغر هنيالج بهاي
حصلتي برصيف الفقره تعيين
تخرجتي بعمر ينعد بالايام
بجامعة الفقر قسم المساكين
اشوفنج رصيف الفقره لفاج
يمكن بيج مستقبل تجدين
دعائج يختلف مو للرزق جان
دعيتي بصوت دمعه ونبرة ونين
ربي اخلقلي واحد يلعب وياي
مني استنكفو ولد الجوارين
انفتح برسوم وجهج حي تجاعيد
فطور شفايفج صارن درابين
فرك جازه الوكت بضلوعج وفات
ورد اردود خلالج نياشين
شعار العوز من زغرج حفضتيه
ربع يهل الرحم يستركم حسين
صفنتج شينت روس التماثيل
وحسرتج خسفت بطون الحياطين
ضيم وريح عوز براسج يدور
بس تغيم بخلكج تمطرين
ذبل ورد الرموش بملح الدموع
وشالة دمعج اطفي البراكين
طفل وبصف الاول راسه بيه شيب
نضرتج غيرت كل الموازين
المشرف من يطب بصفج يكول
بصف اول انه لو دار المسنين
جفج بالقراءه يكلب بخوف
ويم قدوري اسمعنج تكولين
شني قدوري دق الباب شيريد
بس لا حاله مثلي يدور طحين
سجاجين الوكت غركت بلجروح
وضهرج صار معبر للسجاجين
استشهدتي بزغر والقاتل العوز
وكتبتيهه الوصيه بدمعة العين
ذمه بركبتك تدفنهن وياك
بساطي ودفتري ولعابتي الطين
رد مع اقتباس
