بديت امسح خيالك والصور والشوكَ
واجر خط الموادع واشطب العشره
انه امَـشي اعله جرحك ليل بي دمعات
يادمعه التطيح اطيحلك .. ذكره
عرفتك من غبت فاتـح لغيـري الباب
البي ريحة جهنم ينهجـر كَبره
اجي بلهفة رسالـه لأم ولد مفقود
وارجع من اشوفن لهفتك صخـره
وارد فشلة هذاك الحـزمـوه لـثّار
وحظه بجتال اخوته وتفكَته اتغدره
يبو احساس الجذب ميفرزن الضحكات
الهندس ماتميز الشمعه والكَمره
صرت حيرة سلف ماحظه بعطوة شيخ
يمر الليل ناسه وكلهه متحذره
انا الشايلي نورس وانت شلت غراب
تجمعهن سمه ومايلتقن مره
وياعضة ندم تتشافه بيهه الروح
اذا كل طعنه منك تخلص العَشره
اهزلك دله بيدي ومااهز فنجان
هلكَد ماعشرتك عبرت المره
عله الصبيره رهمت يازرع يالون
السمه تمطر سنه وماتقنع الصحره
وعله وجهك ضحكتك تنصب تمثال
وانه بريتي جوادر نصبت الحصره
ولتصدكَ ضحكتي امكابره الشمات
خلهه بصفي تطلع بارده الجمره
اذا تكسر غصنهه الريح من اتفوت
قَضية الموت وكفه اشتنفع الشجره .؟
على طول الضوه خلكَي انا جان وياك
اطّول حبل ودي وغدركَ ايكَصره
بكَد ماضاملك عاتبني حته البير
البحر يكشف اسراره وروجته اتستره
شماتطلع شمس ينغفر ذنب الليل
ولان ليلك هُبل بس فاس التغفره
ياذاك التعب .. والد وابن مذبوح
ويشوف ارباه وتعبه اتبوكَهن حفره
للشاعر " سالم الدبيسي ...
رد مع اقتباس
المشاركة الأصلية كتبت بواسطة اسرار بلا عنوان
