سرفن دموعك
ولم حسرات صدرك
واصرخ وبدي البجي
من غيمة عيونك حضارة ..
وشيل راسك يالبروحك
سنبلة , وكَمرة , ومنارة ..
وسّير اعله عيون الحديثات كحلة
وسولف وخلي الربيع يفك شليله
وعلى الكَاع يطش خضاره ..
كافي نتزاعل ولو لحضات
ونرد نلعب بكترك حبايب ..
صيح بغدادك تجي تلاعب بنات بيوتنه
وتظفر سوالفهن كَصايب ..
علمتنه انخضر
بكل كَاع شيلة نثية
جلاب وبخت بعكَال شايب ..
بطين كَاعك ياوطن
ريحة نبوة انشم وامامة..
ولهذا شما تمر سيوف
نلتم عنكبوت ونكَعد بحضنك حمامة ..
الينزرع خنجر بضهرك
باجر بروحه الضمير
يخضر اعتاب وملامة..
كافي ياحاكم يجي يعوف العقيق
يسبح بروس اليتامة..
كثر مانيتك شريفة ..
شلت بيدك مستحاك
وحكته للكَاعد حدر كترك صريفة ..
ياوطن باعوا قيمهم
واشتروا بيهن عمارات وفلل
كلش سخيفة ..
وانت بس انت الاصل
باقي اكَهوة ,
وحكمة , وهلا , وغيض , ورضا ,
ومخلص حجي فارش مضيفه ..
شكد احبك
للحرب يامن سرجت السيف مهرة ..
وعركَ كَصتك غيم بوجه العطش
وتبده ثورة ..
وبالرغم عن القصف والنار
كاعك بقت محبس
والنخل ضل جنه شذرة ..
انت تاريخك بساتين اورد جوري
وحمام وكَاع مدري شطولها
وكَذلتهه خضرة ..
وهمه سالوفة يباس
الجلمة من اتطيح صفرة ..
صّدك بتاريخهم يمشي العطش
والعطش خطواته صحرة ..
المايريدك لا تريده ..
واكسر ارموشه بديك واطير
من عين النظرته مو بعيدة ..
اشكَد احبنك يمن روحك عنيدة..
يمن مثل الغيم روحك
من تموت ترد تدور بكل سما
غيمة جديدة ..
اشكَد احبنك
يمن روحك
عنيدة .
للشاعر : محمد ابو العز
رد مع اقتباس
المشاركة الأصلية كتبت بواسطة اسرار بلا عنوان
