يل حبك جمر وآنه الحملته سنين
شلته وعلكلب آنه الكلت خله
وعليك اتسترت حته اعله كلبي وياك
وانته اعله اليحبك تنطر الزله
وآنه ادري بيك لغز بس كلت احلك يوم
انحل عمري كله وماشفت حله
انته انطيتني من العمر لحظه وياك
بس لمن خذت..خذت العمر كله
تهت عني ورحت بس كلشي راح وياك
وتيهت العنب وانباكت السله
وما ميز كمت بالضدي والوياي
شبجت كلهه عندي الصعبه والسهله
اضم سري اعله غيرك..وانت سري شبيك
ياهو الوهدنك ولغيرك اتكله
حرس من حته روحك..آنه جنت وياك
وحرس كالولي انته ولاكلت ظله
وحجو كالوهه ذله وآنه اكلهم لا
وآنه ادري بيهه ذله وماكلت ذله
اشد جف اليضدك لأن اخاف عليك
تحط جفك بجفه وبيدك تحله
وسل عمري الك لجفوفك انته مراد
وعليه لمن اجيتك سيفك اتسله
واتلاوه ويجرحي وعينك انته تشوف
وتمر مر الكرام وعلجرح تضحك
مارايد ضمادك فوك جرحي يصير
فوك الجرح ردتك ماردت ملحك
ورمحك عاليضدني يصير مثل الريش
وآنه لهلوكت ينزف اثر رمحك
وصبحك جنت انطره ايشك ظلام الليل
طلع ليل عله ليلي وماطلع صبحك
وجرحك مانشف من رحت عني بعيد
نشف ماي البحر بس مانشف جرحك
رد مع اقتباس
المشاركة الأصلية كتبت بواسطة كبريائي قاهرهم
