الجزء الخامس ابوذيات الشاعر حسين الساعدي







حبايب ونتسامر وَشعليهم!


أظن اريل هواهم وَش عَليهم


صبي النفط بيهم واشعِليهم


لأن حركوا اكلوب العاطفيه







-----------



مثل طابوك عمري انشمر وانساف

وساف الكلب بس ما كال وين ساف

اتمنى اخذ العبوه اوياي وانسَف

بيت المارضوك اتصير اليه







-----------





أنه اليتضاوه اسمي مثل نشره

وايميلي اعله كل الناس نشره

ما بعنه الصديق ودوم نشره

ولا ضايع على اليسئل عليه







-----------







زماني شَرط شرطه وصعب شرطه

إذا ما اعوف حُبي ايجيب شرطه

شريطه فلم مرعب شوف شرطه

قاسي ابشرطه حيل اشسوه بيه



----------



حبيبي وادعي لعيونه سلامه

واحب اوياي يتواصل سلامه

احبه اكثر امن اهله سل امه

هيه السمته وارباه عليه





------------









أعاين جَيتك كل يوم وأرباك

وتعبني هواك اشكثر وارباك

سَببلي قَلق وهموم وارباك

وكله ايهون بس تسأل عليه







--------------

حسين الساعدي





اشوكت نكعد وَحَدنه ونتشاور

وأنه أخذ سباحه وأنتَ شاور

وحطن بيك حوبه وانتَ شَور

إذا وَياك أزلن شل اديه



-----





غريب الطير هذا ماهو النه
نظن يهوه ولكن ماهوه النه
واحنه اعله المحبه ما هَوانه
مشينه ابسرعة الظامي أعله ميه
-----------



دَربك دوم أفكده ما هملته
ودمعي الغير شخصك ما هملته
وكلبي ابمله طايح ماهي ملته
يجرني الناره كوه اشسوه بيه

-----



أحبه ابكثر ما بالدول سِكان
ولا ساكن ابكلبي غيره سَكان
سياره تركني ابغير سكان
وحفر كِدامي حفره وعَم عليه



الشاعر حسين الساعدي