هلووو .. شلونكم & سنة حلوة عليكم
اشارة لهذا الموضوع
http://www.dorar-aliraq.net/showthread.php?t=13406
قبل كلشي .. احب اشكر كل اللي كتبولي .. و تمنولي السلامة .. سواء بالموضوع الانف الذكر .. او بالملف الشخصي
اشتاقتيتلكم هوااااااي ... كلش هواي.. و ما مر يوم ما اجيتو على بالي .. و ما تذكرت المنتدى و الاحباب المتواجدين بيه
ملخص السفرة او الايفاد مالتي .. طرت من مطار بغداد لمطار عمان .... و كعدت بفندق بمنطقة اسمها (صويفية) .. و اخذنا محاضرات تبدي من ساعة 9 الصبح للأربعة العصر يومية حتى يوم الجمعة .. . وياي اصدقاء طبعا .. و افترينا بالمولات (سيتي مول و مكة مول و البركة مول و استقلال مول و ماكسم مول إلخ) و بـ (جبل الحسين) و رحنا لحدائق الحسين و جم منطقة بعد . ..صور الملك والملكة الموجودة بكل مكان .. حتى شكول ملوكهم تفتح النفس .. شحال الشعب!! خخخخ .. اكو انترنيت بالفندق .. بس ما كدرت ادخل للمنتدى لأن ماكو مجال و ارجع تعبان.. سويت مناك من مصرف من المصارف بطاقة دفع عبر الانترنيت (فيزا) بخمس دقائق (بالعراق طولت عندي 4 اشهر) .. و كدرت ادفع اشتراك الموقع بكل سهولة لمدة سنة و 3 اشهر مقدما .. بعد أن واجهتنا هذه المشكلة بالفترة السابقة .. و جان اكو احتمال الموقع ينسد خخخخخ .. المهم .. الاردن بلد متطور جدا .. .. و غالي بنفس الوكت.. ما رحت لا للبحر الميت و لا العقبة لان ماكو مجال .. و حاولت اوفر فلوس علمود اشتري لابتوب جديدة core i7 ـ.. و رجعت البارحة بيوم 31 طارت الطيارة ساعة 8 الصبح .. و اني نمت قبل لا تطير من الكاع .. لحد ما وصلت للكاع من جديد خخ .. و رجعت نمت بالسيارة للكوت .. . و من وصلت البيت نمت لليل و كعدت شفت سيد ايسر و علي الواسطي (اللي مرو علي للبيت) .. و شفت بعدين جاسم و احمد ساليوت .. و رجعت للبيت نمت كذلك .. .. و ها انا
الجدير بالذكر .. هذه ثالث سفرة إلي للأردن خلال 3 سنوات .. حتى مليتها هع
هسة لكيت 36 تنبيه عندي .. راح احاول اقراهن و ارد عليهن .. و احتاج شوية وكت علمود ارجع للجو من جديد .. طبعا هذه شهادة فخر و اعتزاز أنه هذا الكم من الاعضاء يسألون علي و مفتقديني .. و كل واحد بيهم هو أعز من عزيز علي ..
احب اشكر كل من دالين و سالي على الجهد الراقي بصورة خاصة بهذه الفترة .. و اشكر كذلك كل الاعضاء اللي ساهموا بتفعيل المنتدى طول هذه الفترة عبر المواضيع و المشاركات و المراقبة و التواصل مع بعضهم .... و إن شاء الله الفترة القادمة تكون من حسن إلى أحسن
تحياتي & و ارجو المعذرة من اي تقصير
رد مع اقتباس
المشاركة الأصلية كتبت بواسطة Daleen
ليش تسوي هيج بالولد خخخ 