درر العراق

ارجع يازمان · 29/April/2013

2-ابوذيات الشاعر حسين الساعدي-الجزء الثاني

سَمني بأي إسم ملجوم سَمني
أنه المغدور والربيته سَمني
مو من عافيه امن اتشوف سِمني
ترى سم الغدر زادوه اليه
------

----------

الشعر راقي ابرقي الورد وأرقه
مو بس بالقلم وتجيب ورقه
الشعر أحساس ينبض وفه ورقه
وِإله ابكل المشاعر جاذبيه

--------------

روح اسأل الكرنه وبعد سيبه
على روحي السابت فَرد سِيبه
صديق الما يجيك ابعسر سيبه
واحسبه هو والماكو سويه

------------

شوكك للتحبهم دوم وداك
لان همه دواك اصبحوا والداك
امك ويه ابوك ومنو وَداك
يحفضهم الك رب البريه

--------------

فَصلتك عَلي ماجيت كَدري
وَاشوفك ما تقدر يوم كَدري
امكَدرني اوتكول اشسبب كَدري
ولا جنك جبت كل الأذيه

-----------
حسين الساعدي
طَبعك هذا من اليوم بَطله
امخليني سكران وكاظ بطله
اشجم طَله الشفت منك بِطَله
ولا مره انكسر كلبك عليه

--------

اشوكت نكعد وَحَدنه ونتشاور
وأنه أخذ سباحه وأنتَ شاور
وحطن بيك حوبه وانتَ شَور
إذا وَياك أزلن شل اديه

---------

أعاين جَيتك كل يوم وأرباك
وتعبني هواك اشكثر وارباك
سَببلي قَلق وهموم وارباك
وكله ايهون بس تسأل عليه

-----------

روحي اشتهت هالليله تُمر بيك
مَدري عَسل ما أدري تَمر بيك
دون الناس من اتمر تمر بييك
هيبه وبس الك تحله التحيه

---------

الدنيا بالمصايب عَلي حَلت
مثل حَلت اسهام ابيوم حَلت
طعمها المر ولا فد يوم حَلت
ومرارتها أمر من المنيه

---------
الشاعر حسين الساعدي

منقوول