السلام عليكم....
اليوم حبيت اجيبلكم حال الطالب الجامعي مال هل وكت
اول شي طبعا كالمعتاد امة تصيح عليه بيها 32 مرة وتصيح وتستريح حتى يكعد الاخ
من النوم ( والمشكلة ياريت يسمع )
مرة مرتين كَولوا يكعد بعد ما بلعوم امة انشحط ابوه ابوه
راح على اساس دا يغسل وجه ( طبعا اي صابونة يلكاها على المغسلة يغسل بيها
وجها ان شاء الله صابونة اماعين ماعندة اي مشكلة )
اجه دا يريد يلبس ( تلكة على كل قميص مكتوب عليه يوم معين .. القميص الابيض
ليوم الاحد والسمائي ليوم الثنين والبنطرون الجوزي ليوم الثلاثاء .. مو هو
مايريد يكرر القطعة الوحدة اكثر من مرة بالاسبوع اي شعبالكم )
على العموم وبعد عناء طويل شاف المعدل شحيلبس ورساله على بر واخيرا
طبعا الجينز خطية تكول جينز حماميل البلدية مسحوت ابو ابو حتى جينز البنة
هماتين ميصير هيج
لا والطكَع على ساعة يوكع من - الخصر النحيل -
القميص لا تجيب طاريه راح ينفتك من الجتف من كد الضيك ........ !!
وصلنة الى اتعس نقطة الا وهي نقطة الشعر .......
راح لم المغسلة او اي مراية قريبة يخلصة لنص العلبة مال جل ويخبط اشوية دهن
وياة بحيث الشعرايصير طابوقة
يلزم المشط وشعرة شعرة يدهنها ويصفط وحدة يم اللوخ ( على ان لا تبعد كل شعرة
عن الاخرى بما لا يزيد عن 2 سم )
وبعد ما صار الراس عبارة عن معمل (دهن سيارات) وازاد وزن الجسم 2,5 كيلوغرام
وصلنا لمرحلة الحذاء طبعا الجواريب لو الماما تغسلها لو تلكه 67 زوج مشمور
جوا الفراش
( مستحيل يغسل جواريبة الاخ ومستعد يشتري 5 ازواج كل اسبوع بس ميغسلها )
****
كولوا طلع برا اجرلها كية المسكين وانجبس بين 13 نفر وخايف على شعرة من هوا
الشباك اخاف يطير ( وبالاصل انت لو تجيب هليكوبتر يهفي على راسه ما تطير منه
شعرة من ورى الدهن )
دخل للجامعة يحس نفسة توم كروز العراق ......... اول الصبح ما يقلد ويسلم من
ورى خشمة وما عاجبة العجب
يروح بكل تاني للكافتريا ويطلب استكانة جاي (سوالف مال حدايق) ويطلع الجكاير
ويكعد يتصرف كانه كزنوفا بالرومانسية والرقة .... ( استكانة الجاي بالبيت
تخلص ورى نص دقيقة بس بالكافتريسا تخلص ورى 20 دقيقة !! )
المحاضرة الاولى مو مهمة بالنسبة اله واذا فاتته موجودة ( ساندرا تنطي
محاضراتها للاستنساخ)
اجوي البنات من المحاضرة دخلوا االكافتريا (تلكاه يعدل الكعدة ويستعد كانه
حيبدي يصور فيلم ينعرض قريبا في سينمات هوليوود )
يخلص باكيت الجكاير وتخلص قواري الجاي وهو كاعد مسوي نفسه الهائم العاشق
الحزين ذو القلب المنكسر ( جذاب لاتصدقوا الحجي للبنات طبعا )
العين عبارة عن رادار لاقط يفتر من 4 جهات 24 \24 ساعة في الكعدة
كامت وحدة حلوة وطلعت من الكافتريا المسعدة الاخ صاحبنة قرر واخيرا يشلع نفسة
من الكرسي وصار يمشي وراها ( مو هو البدي كارد مالتها )
منا منا وصل الها
- صباح الخيرساندرا ( والابتسامة الخلابة لا تفارق وجهه الفاهي )
هلو شلونك
- شخبارج ويا الدراسة ( هذا السؤال يتكرر كل يوم الصبح يعني بحيث بالاخيرقرر
يخزنة بالموبايل تجنبا للتكرار )
اني زينة انت شلونك - طبعا المسكينة مستحية -
- اني بس ردت اطلب منج دفتر البرمجة لان اليوم مكدرت احضر المحاضرة الاولى
تعرفين بس اني عندي سيارة واصدقائي يردون يصعدون ويايا اوصلهم ( كام ايطير
فيالة )
اي عادي تفضل
- شكرا اني استنسخه وارجعه الج شوكت اشوفج (هي اربعة وعشرين ساعة موجودة لو
بالاكافتريا لو بالقاعة )
اني تلكاني بالكافتريا
- ماشي شكر
العفو
( طبعا لا يستنسخ ولا شي جذب والدليل لما تجي الامتحانات تلكاه يكل لبو
الاستنساخ من البداية لحد النهاية !!! )
كولوا رجع الدفتر لساندرا بعد كلام طويل وعريض يرادله موضوع على حده حتى
اكلكم شنو كال وشكلتله
يوصل للبيت يلبس البجامة ويركض جنه كلوله ترى المنطقة بيها وباء وركض على
اقرب ساحة لعب طوبة ومتلكاه الا ساع 12 يدخل للبيت كبل لنوم لا دراسة ولا هم
يحزنون
(اما طلاب الاقسام الداخليه فالله يساعدهم يجون من الدوام متاخرين يسون غده ويتغدون وراه ينامون فهذا الحجي ما يشملهم لان اني منهم هههههههههه .........)
تحياتي.....
رد مع اقتباس
المشاركة الأصلية كتبت بواسطة Gardenia
