هنا

[ارجع يازمان]

الجائزه: رصيد 20 $_ مع شهادة تقديريه
السؤال!!قصيده والمطلوب تذكر كم مدينه او منطقه ذكرت بالقصيده ((كتابه)) وليس (( أرقام )) .. يرجى الانتباه!! ترى اكو كلمات ممكن تعتبروها مجرد تعبير او شعر! لكنها هي فعلا اسماء لمدن بالعراق ,, وخاصة كان تركيز القصيده على كل مناطق بغداد تقريبا
,,,,,,,
بيك امسامر العشار!
بيك املوحة البصره

وبميسان الك تذكار
وكميت اليجر حسره!

من حلفايه للاهوار
حي الوحده مفتخره

ما تدري باأهل ذيقار
لا حبوبي لا شطره

وبحي سومر المشوار
طلعوا شارع الثوره

كلها اتصيح ياستار
لمن تخزر الخزره!

يمك دارت الانظار
سماوه ورمثه والصحره!

الطالع منها تايب صار
سلمان ابتله ابنكره!

اهناك البدو طشار
كلمن دايخ بأمره!

والحله العليك ا تغار
نادر هسه منتظره

يايوم التضوي الدار
الوادم كلها مبتشره!

والكوت ابهوه الجمار
الك هالليله متعطره

طلعوا طشوا الازهار
من السده والبدره

الديوانيه تحجي اشعار
وصفك يعتبر جَبره

غماس وعفك وادغار
الأل ابدير والنفره

هذا الوصف الانوار
وذاكه ايوصف الكمره!

هاكد ما تراعي الجار
هاكد صاين العشره

نوصل للنجف زوار
وانته التدعي بالحضره!

تربيلك ازغار اكبار
حتى الصايم اتفطره

كون الكربله المشوار
بيك العايل انعثره!

لا تكفيري لا غدار
يوصلنه ونكف شره!

صلاح الدين والانبار
صدوا داعش ابكُبره!

لكن شافوا الاخطار
بيك وضاعت النصره,

وديالى التريد الثار
تلكه ابمندلي العبره

عاين بالشمال اصار!ّ
صارت كلها محتره

أربيل المشه السنجار
اسليمانيه منتظره!

وكركوك انفجر أبار
والنار الصفت كَبره

ذوبت الثلج يا نار
بيك وغركت البحره!

والموصل ازغار اكبار
منك رادت البُشره

تطرد داعش الغدار
عينك لمن اتخزره!

حتى اكرونا والاقدار
منك كلها متحذره!

وبكرخ ورصافه اخبار
هذا اليوم الك مره

سيديه اويه سبع ابكار
كراده وعله البره

حي الصالحيه اندار
يم المنطقه الخضره

ميكانيكي والنصار
والزعفر عله الجَره

وكفوا وكفت المسمار
حتى الطايح اتعبره!

غزاليه والف يادار
ذبوا كتبه والطره

واليربح تجيه خطار
كلمن طابخ ابجدره!

خو زيونه والتجار
كلها اهناكَ منتشره!

والشيخ ومطار الطار
عالحريه اخذ نظره

ويه الحارثيه الصار
مكسور وبجه ابكسره

ماكو داعي للعطار
وانته ابكسرته اتجبره!

لو بالجادريه افكار
بيك امنوره الفكره!

الجرف والجسر والدوار
وغدير ومريم امنوره

واليم البنوك أعمار
كلمن دفتره امحضره

رادو صوره الك تذكار
حته الشافك اتسره!

لجلك عزفو المزمار
كماليه ابهوى السمره

دَخلت الرصافي انذار
محد واكف ابكتره

راد ايوصف الاضرار
باشعاره التضل ذكره!

بوب الشام والانصار
وحسينيه متحضره

بارض الراشديه انذار
العامر زارع النظره

الشعب والصحه والمختار
بين اليمنه واليسره!

بالنهضه وعله الدوار
كالو تبتدي السفره!

تعال ورتب الاوتار
واعزف نغمة الفقره!

وبأرض المدينه احرار
ما خافو ا .... ولا مره

باركهم شبل كرار
من الاولى للكسره!

الساحه ومريدي اندار
لعريبه الرفع سعره!

والفلاح ابو الاثمار
ضل ابحصرة الثمره!

الداخل عليك ايغار
وجوادر حاير ابامره

بالكياره تدري اشصار!
ابقلق وبهمها متكتره

وجميله اتراقب الاقدار
تشوف الدنيا مفتره!

وباأم الكُبر طشار
الك بالشوفه متحسره!

وبحي اور الاستنفار
جنها الفلكه منفجره!

وفضيليه دار ابدار
غاد امعلكه النشره

بلديات الك تذكار
نصبو خاطر اتمره

المعامل و التنك محتار
مثل النايم ابكبره!

لاهل الاعظميه اعذار
كلمن حاضر ابعذره!

من الكاظميه اختار
ياهو الماوفه ابنذره!

انته اتحدد الاسوار
من الفضوه للجزره!

الشرطه التطب الغار
والضباط الك تبره

وسط الجامعه المعيار
حتى اليرسب اتخسره!

والكم ساره والخَضار
والجوبه التجر حسره

والشعله التوج بالنار
ما تطفه ابهوه المطره!

لوما ترتوي الاثمار
تبقه ابعازة الكَطره!

حتى ابواحة الاشجار
ما طلعت ولا ثمره!

المعظم الك يندار
عالميدان اخذ نظره

عنتر شاهر البتار
والحافظ حفظ قدره!

أبو نؤاس عاف البار
جر اعله النهر خمره

حجيك صَعد الدولار
والشورجه التذب حسره!

ورسمك زيد الاسعار
شو طفرت فرد طفره!

ادري ابجَيتك الامطار
راح اتخضر الصفره,

يم الطوبجي المشوار
وعالوشاش اخذ فره

بالمنصور اجه الاعصار
تعال واكشف الغبره!

وبالتحرير الك ثوار
الباب الشرجي متسطره

والبياع اخذ سمسار
باع وحقك امحضره!

وسبع اقصور ضل محتار
شاف الثامن ابكتره!

وابو سيفين والانوار
وبحي طارق العبره!

بغداد الجديده اسرار
امين الماحجه ابسره!

العبيدي ايصيح ياستار
اليغثك فلك طره!

الشماعيه كلها اسرار
من عدهم اخذ عبره

اجم مجنون الك بالدار
مات وما حجه ابسره!

ادريس واكد وانصار
الرئاسه ابفكره مبتكره

كفاح وحيفا والاحرار
والاعلام الك نشره

ومعالف والتراث اعمار
والجمعيه والدغره

وبستان ودوانم صار
الدباش وهدى وزهره

ورواد البوعيثه أخيار
العرب اجبور الك مره

وجسر اديالى العبار
وبسمايه النطر جسره

وتاميم وغدير اندار
التل امحمد العبره

ونيسان ابخطى الاثار
على الاندلس مفتره

وبحي الجهاد اصدار
صدروا باسمك الثوره!

العدل والفضل والانهار
فرات ودجله متكَدره!

الصدريه ومربعه الدار
أبد ما تنتهي السهره!

وبتاوين الك أسرار
ومعارض ماخذه الشهره!

تلكه النهروان اكدار
متره اتفصل ابمتره

وزيريه وعمر خطار
عالسعدون اجه ابعطره

تونس مغرب وتذكار
فلسطين ونصر ذكره

حي القاهره الأنظار
الك وتاجي والزهره

هذا الدولعي اليختار
بلكريعات الك شمره

والفحامه لو تنزار
هسه الشافك اتصوره

حتى اتفرح الأخيار
والما شافك اتقهره!

اسكان التضوي انوار
ونعيريه منتظره

يرموك ورشاد ابرار
دعولك ساعة العسره

ابحي عامل الماصار
خلفه ايرمم ابقصره!

الدوره ابضوه الابار
وابو ادشير ابتله ابامره

ابو اغريب ابكفه المختار
بالفلوجه منحصره!

مدائن ضد الاستكبار
طاك اتعنون الكسرى!

محموديه يا اخيار
سور العاصمه الحره

كالوا سيرت تسيار
بيك الدنيا متأثره!

الساحر يسوي أسحار
بس ما جابك ابسحره!

كلها اتريد الاستفسار
سرك ياهو اليفسره!

الصبر مو مثل الاستصبار
الشعب متعذب ابصبره

هسه المؤمن الصبار
مثل الحاضن الجمره

واقعنا ابزمن غدار
المعلم منشغل فكره!

كام ايرسب الشطار
لان دولتنه متأخره!

دك العسكري الانذار
عاف العلوه والخضره

الشلبه الصبخه ما تنزار
لان كلمن بنه ابقصره!

بعد منصادف الايثار
الحر قانع ابعذره!

الحميديه اسم مختار
لاهل المنطقه الفقره!

مبتليه ابدسيم الصار
ذيج الصفحه عاليسره!

جاور سوك الاستعمار
الحراميه البقت كتره!

امدوخني وحرت شختار!
بين الكتبه والطره!!

باقي ابقصتك محتار
وأبعد عنك النضره!

اجروحي العفتها ازغار
كبرت رادت الطبره!

ليوين أكتم الأسرار!
ليوين أحضن الجمره!

وافكار التجر أفكار
بيك وضاعت الفكره!

انه امساجل المغوار
ويا شاعر يجي ابشعره!

جنت اتعنه للكسار
هسه امظيع الخبره!

دايخ والزمن دوار
فتره اتسلم الفتره!

شايفلك ابو الايجار
يطالب مالك الاجره!

اليعرف صيدة البتار
لازم يمتثل بامره!

ناطر شوفة الجمار
قبل لا تطلع الكمره!

متندم عله اللي صار
سكران التهه ابسكره!

ياساعه الكتبت أشعار
جانت ساعة الكشره
جانت ساعة الكشره
حسين االساعدي

[الرميثي]

هاي القصيدة يرادلها واحد مختص بجغرافية العراق
ويعرف كل المدن العراقية وبيده حاسبة ويحسب
بس حلوة عاشت ايدك ههههه
ذكرتني بقصائد امرؤ القيس الصعبة