قصيدة : علي بتوصيفه محتارين
للشاعر : زين العابدين المرياني
: ليلة 22 رمضان 1446 هـ
:حسينية و موكب أم الحسن ع البصرة قضاء الفاو
طور : #شوط_كربلائي
علي ابْتوصيفه محتارين
علي قبله علي قرآن؟
وَلكن بالوصف يكفي
إذا گلنه علي إنسان
▪️▪️▪️▪️▪️
علي ابوكت الخطر معروف
يلاگي المعركه ابصدره
وَلا خاسر نِزال ابيوم
جَسِر والفارس ايشطره
وابنفس الوقت حيدر
دمعه أرمله اتكسره
أبو الرحمه وابو الكلفه
ثگيله بالحرب چفّه
واذا يمّ اليتم ترفه
الفكِر حاير ابهالضدّين
وايدوِّر بَحِث تِبْيان
▪️▪️▪️▪️▪️
علي اِنْسانيّته عُظمى
عجيب اليا مدى واصل
الطبيعي يستحي اليسأل
اوعلي يستحي امن السائل
حتّى اويه اليشتمونه
ابكرم چفّه علي ايقابل
ابْصفاته العادل اتجلّه
وَلا شفنه مثِل عدله
بشر لا بعده لا قبله
وَلا مَرْ مثِل إحسانه
بالوادم الحدّ الآن
▪️▪️▪️▪️▪️
أمّا عن سياساته
إذا گلنه علي حاكم
علي أوّل ملك يبقى
يسهر والشعب نايم
يفتر على المحتاجين
ما ودّالهم خادم
ابليل اويفتر اعليهم
هوّه ابنفسه ينطيهم
ابعازه ما يخلّيهم
علي بس فَتْرِته بيها
ما واحد بقه جوعان
▪️▪️▪️▪️▪️
علي ما حكم بالحِيله
وَلا شورى أخذ أمره
علي ريّس والانتخبوه
كلّ الوادم الفقره
علي يحكم اوكُرسيّه
حصير اوسطوته صبره
أوّل حاكم ايظلموه
اويكتم غيضه لو آذوه
للبير اشتكى خلّوه
لأن ما يفتهم حلمه
من هالبشر ياهو الچان
▪️▪️▪️▪️▪️
حيدر رحمته كبرى
ما موجوده أمثاله
بفْراش الأجل هوّه
اوينظر دمعة اعياله
ياهو القبله سوّاها
يوصيهم ابچتّاله
من زادي تطعمونه
وابعطفي ترحمونه
ابكلمه ما تآذونه
إلّا ابموتتي يعني
حَسَن يبني قصاصك حان
▪️▪️▪️▪️▪️
عن رحمة علي اوعطفه
كلّ العالم انسأله
وابهاليوم محتاجين
واحد بالحكم مثله
عصْر الظلم آذانه
ردنه حيدر اوعدله
ضهدتنه مآسينه
والظالم فِتَك بينه
حامي الحمه احتاجينه
صحنه كافي منّ الجور
وامن البَطِش والطغيان
▪️▪️▪️▪️▪️
ابوذيات : وردها ، وحشاه ، نعشاك
للشاعر : ناظم الحاشي
روحي المُر بَعَد موتَك وردهه
إو ذِبَل يابوالحسن بَعدَك وردهه
أحُط صينيّة إفطارك وردهه
على السُفره بَعَد ماضن بديه
▪️▪️▪️▪️▪️
فگدك حرگ لب الگلب وَحشاه
إو لِزِم سِبّاحه يابوالحسن وَحشاه
يراعي البيت مو بَس إلك وَحشاه
علي إفراگك هِجَم بيتي عليه
▪️▪️▪️▪️▪️
حَي مَيّت يبوالحسنين نَعشاك
يَضي إعيونّه إوما يوم نَعشاك
من شالو علي إمن الدار نَعشاك
روحي إو نَعشَك إنشالن سويه
▪️▪️▪️▪️▪️
رد مع اقتباس