قصيدة : داي و دوه
للشاعر : ميرزا عادل اشكناني
: ليلة 22 رمضان 1446 هـ
:حسينية و موكب أم الحسن ع البصرة قضاء الفاو
طور : #زينب_وطن


داي او دِوه .. ماي او هوَه
نار او نَسِم .. حرْب أو سِلِم
جامعها حيدر
▪️▪️▪️▪️▪️
علي داي او نزل عالكفر طاعون
علي إسمه دواء او كحْل الِعْيون
علي ماي او هوه البي عايش الكون
علي نار او نَسِم جامعهن اشلون ؟
حرْب للحارب او سلْم اليسلمون
علي کلها ابعلي او كلهم يعرفون
يَـمِّ الإله .. اشگد عنده جاه
كل هالصّفات .. و المكرماتْ
و الخافي أكثر
▪️▪️▪️▪️▪️
علي أمره صعب , ذَكْوَان , مستورْ
علي نورٌ على نورٍ على نورْ
علي اكتاب الذي بي تاه معذورْ
مو ياهو اللي يقره بين الِسْطُورْ
ابميلاده انطبر بيت الله مسرورْ
و ابِّيت الله تالي ايموت مطبورْ
ابّيت الله فات .. ابّيت الله مات
شوف الخلود .. ابحال السجود
راسه ايتطبَّر

محمد بن حسن الصفّار في بصائر الدرجات عن المفضل عن أبي جعفر الباقر (ع) : {ان حديثنا صعب مستصعب ذكوان أجرد لا يحتمله ملك مقرب ولا نبي مرسل ولا عبد امتحن الله قلبه للايمان
الذُكاء: التوقد والالتهاب، أي ينور الخلق دائما
▪️▪️▪️▪️▪️
يسبحان الفلق من نوره نورين
علي نفسه محمَّد لاچن اثنين !
علي فوگ المتى و اللّيش و الوين ؟
كل الاسأله اصغر من أبو احسين
علي بس هوَّه جامع بين ضدِّين
علي يدمع اِبْعين او يخزِر ابعين
ابچفه قَنَاة .. او سبحة صلاةْ
چف للقنوت .. چف بیها موت
يقلعها خيبر
▪️▪️▪️▪️▪️
علي الدنيا أبد ما مال ليها
عاش اسنينه بيها او ماهو بيها
الخلافه اتلوگله او لایگ علیها
لچن لو ما تجیله ما یجیها
الناس اتنافق اوياه ابحچیها
تتبسّمله و اِتْطعنه ابإديها
طبع اليخون .. يوميَّه لون
يوم الغدير .. ياهو الأمير
او ياهو التأمَّر
▪️▪️▪️▪️▪️
علي البچفوف إديه ايلوح النجوم
تشوفه يرجف لدعوة المظلوم !
علي المهموم عاش او مات مهموم
نعَم ميّت لچن عایش إلى اليوم
طبيب الناس سرَّه لهسّه مكتوم
علي ايشافي الگلوب او گلبه ملچوم
ابگلبه عذاب .. بسمار باب
بعده يلوع .. لذيچ الضلوع
او صدْر التكسّر
▪️▪️▪️▪️▪️
علي البكّاء بالمحراب باللّيل
علي الضحّاك وكْت امرادَم الخيل
علي المرتين بسمه ناده جبريل
أمس بـالـ لافتى و اليوم بـالـ ويل
دخيل الله انطبر حمّاي لدخيل
على شيبه الكريم ادمومه اِتْسيل
ناده الأمين .. يا مؤمنين
والينه راح .. ابمحرابه طاح
الله أكبر
▪️▪️▪️▪️▪️
ذاك اللّي يغطّي وجهه بلثامْ
اتراب امغطّي وجهه او صرنه أيتام
النجف أبدت حزنها ابسود الأعلام
او بالشام الشماته و الفرح عام
الشماته هاي تنعاد اويه الايام
لمَن زينب سبيَّه اتفوت للشام
مچتوفةْ إيد .. تمشي ليزيد
ابنفس المكان .. ايعود الزمان
الحسره اتكرّر
▪️▪️▪️▪️▪️