قصيدة : ودعنه علي
للشاعر : كرار حيدر الخفاجي
: ليلة 21 رمضان 1446 هـ
:حسينية و موكب أم الحسن ع البصرة قضاء الفاو
طور : #يمته_سيفك #طيف_منك


فِيْ أمَانِ الله وَدَّعْنَه عَلِيْ
بِالدَّمِعْ وِالآه وَدَّعْنَه عَلِيْ
▪️▪️▪️▪️▪️
مِـنْ طُبَرْ سيفِ الغَدُرْ حَامِيْ الحِمَه
اِشْلونْ مَا طَاحَتْ عَلَى الگاعِ السِّمَه
شِفْنَه مِـنْ يَـمِّ الـعَـرِشْ يِنْزِلْ دِمَـه
اِوْ يَـاعَلِيْ صـوتِ الـمَـلَائِـكْ يِعْتِلِيْ
▪️▪️▪️▪️▪️
آه حـيْـدَرْ حَـانْ هَاللّيلَه الوَعَدْ
اِوْ بيت اَبُوْ طَالِبْ وِگعْ مِنَّه عَمَدْ
دِنْيَه مَـا بِيهَا عَلِيْ اِشْتِسْوَه بَعَدْ
لِلْحَشُرْ غيمَةْ حِـزِنْ مَـا تِنْجِلِيْ
▪️▪️▪️▪️▪️
أذَّنِ اِبْـسَابِعْ سِمَه وَحْي الأجَلْ
أشْـهَـدُ أنَّ عَـلِـيَّـاً قَــدْ رَحَــلْ
مَاتْ يَاأهْلِ العَمَلْ خَيْرِ العَمَلْ
مَـاتْ يَاشِيعَه الحَبِيبِ الأوَّلِيْ
▪️▪️▪️▪️▪️
طُفَتْ شَمْسِ الدِّنْيَه وِ اِهْتَزِّ العَرِشْ
الشَّالْ خيبَرْ عِجْبَه يِنْشَالِ اِبْـنَـعِـشْ
اِوْ هَايْ دَمْعَةْ زينَبِ اِبْطَرْفِ الرِّمِشْ
بَـعَـدْ مَـا عِـدْهَـا عُگُبْ حيدَرْ وَلِيْ
▪️▪️▪️▪️▪️
كُـونْ مَـا يِمْشِيْ بَـعَـدْ مِيلِ الزَّمَنْ
وَ اَبُـوْ اِتْـرَابِ اِشْلونْ بِـتْرَابِ اِنْدِفَنْ
البُگه اِبْرَاسِ اِحْسينْ وِ اِبْرَاسِ الحَسَنْ
وِ الـيِـفَـارِگ غَـالِيْ بِـالهَمْ يِبْتِلِيْ
▪️▪️▪️▪️▪️
هَذَا صُبْحِ الكُوفَه أسْـوَدْ بِيْ جَـرِحْ
اِوْ عُگُبْ حيدَرْ كُونْ مَا يِطْلَعْ صُبِحْ
اللّيلَه كِـل احْـلَامْ زيـنَـبْ تِـنْـذِبِـحْ
وِ الأرُضْ مِـنِّ الـمَـدَامِـعْ تِمْتِلِيْ
▪️▪️▪️▪️▪️
كِـلْ يتَامَه الكُوفَه حَسَّوا بِالألَمْ
اِوْ لِگوا كِلْمَةْ بُويَه مَا بِيهَا طَعَمْ
چَمْ يَتِيمِ اِيْصِيحْ بِـدْمُوعِ النَّدَمْ
أنْطِيْ عُمْرِيْ اِوْ خَلْ يِرِدْ حيدَرْ إلِيْ
▪️▪️▪️▪️▪️


▪️▪️▪️▪️▪️
ابوذيات : لا هل ، ما راك ، وياه
للشاعر : ناظم الحاشي
https://t.me/m7bebasim/57721

على غيرك عَساه الدمع لاهَل
جِفيت إولا بُگالي أحباب لاهَل
عيد إبغير وجهك كون لاهَل
إهلاله إولا طَلَع صُبحه عليه
▪️▪️▪️▪️▪️
من مثلك جرع بالصَبُر ماراك
علي بويه ابكثر ماحزِن ماراك
شِلي إبدارك لَوَن بالدار ماراك
ظَلام المگبره ودارك سويه
▪️▪️▪️▪️▪️
گلبي إوداع إبوالحسنين وَيّاه
إبنار وغاب راعي الفخر وَيّاه
الليله آخر ليالي العُمُر وَيّاه
عساني لا يُمُر باچر عليه
▪️▪️▪️▪️▪️