قصيدة : فقره و يتامه
للشاعر : السيد عبد الخالق المحنه
: ليلة 21 رمضان 1446 هـ
:حسينية و موكب أم الحسن ع البصرة قضاء الفاو


فقره و يتامه .. بس ابكرامة
محد يذلنه .. وانت ابسلامة
▪️▪️▪️▪️▪️
ماننتظر .. من الدهر
غير المصيبة
يالغيبتك .. صيحة جرح
ضايع طبيبه
والشمرته .. جفوف الزمن
إيدك قريبة
والما إله .. وادم تحب
إنت حبيبه
لاتمشي عنه .. وانت وطننه
ناسين أهلنه .. وانت ابسلامة
▪️▪️▪️▪️▪️
عزة نفس .. عدنه تظل
وانت ولينه
وانت عدل .. يابا الحسن
منمد إدينه
نظرة أخو .. نظرة أبو
روحك حنينة
لو غمضت .. عينك تره
احنه إنولينه
هاي الأعادي .. كلهم مرادي
من يكربلنه .. وانت ابسلامة
▪️▪️▪️▪️▪️
من ننظر .. الجفك نرى
الدنيه زغيرة
والمانظر .. نورك تره
أعمى بصيرة
وإنت إنزلت .. من السمه
نعمه جبيرة
زالت لأن .. ماتنشكر
والحيرة حيرة
واحنه إبوجودك .. يروينه جودك
يسهل حملنه .. وانت ابسلامة
▪️▪️▪️▪️▪️
يالهامتك .. جانت سمه
وأبعد يعالي
وشلون إبن .. ملجم وصل
روس العوالي
ماندري جم .. عالم نزف
جرحك يغالي
ياذلته .. اليفكد علي
أعني الموالي
أكبر خسارة .. يابو الغياره
منهو المثلنه .. وانت ابسلامة
▪️▪️▪️▪️▪️
إسمك يظل .. طول الدهر
يكسر هممهم
هسه اذا .. صحنه علي
يوكع صنمهم
ذاك الوكت .. هذا الوكت
باعوا ذممهم
إبرفة علم .. من شيعتك
يوكع علمهم
عاود جملهم .. وإلتم شملهم
يصعب قتلنه .. وانت ابسلامة
▪️▪️▪️▪️▪️
وجه العلي .. يالطبرتك
أكبر هضيمة
ناتج طبرتـــك يا علي
دنيانه هيمة
ناتج طبرتـــك يا علي
ما عدنه خيمة
ناتج طبرتـــك يا علي
زينب يتيمة
هاي الحبيبة .. صارت غريبة
سالم شملنه .. وانت ابسلامة
▪️▪️▪️▪️▪️
طف كربله .. هسه ابتده
ابعين الوديعة
تنظر عله .. نحر الأخو
ابروح الفجيعة
تنطر لبو .. فاضل لجن
جفه كطيعة
طبرة علي .. و طبرة أخو
يم الشريعة
تصرخ يبويه .. ذبحو أخويه
ماترجعلنه .. وانت ابسلامة
▪️▪️▪️▪️▪️
باجر إذا .. صاح الشمر
يا جيش أمية
هاي الإسمــــها أم الخدر
صارت سبية
زينب بلا .. كافل بقت
هاي المسية
لو ما بجت .. سبوا علي
وسبوا الزجية
صاحت حمانه .. شو ما إجانه
ما تفزعلنه .. وانت ابسلامة
▪️▪️▪️▪️▪️