قصيدة : يبويه ابهل الوداع
للشاعر : السيد زيد الفحام
: ليلة 21 رمضان 1446 هـ
:حسينية و موكب أم الحسن ع البصرة قضاء الفاو


يبويه بهالوداع
احس كل عمري ضاع
▪️▪️▪️▪️▪️
علي بويه بمصابك ذابت الروح
خلص صبري واشوف بجرحك جروح
انوح عليك گلي اشينفع النوح
اذا بس هالمسيه وباجر تروح
بواچي وإفتجاع
احس كل عمري ضاع
▪️▪️▪️▪️▪️
اكض روحي بوداعك واصبر شلون
وتغير لون وجهك اصفر اللون
يريت الموت اجاني وتعمه العيون
ولا اشوفن عليك إخواني يبچون
وصيّة واجتماع
احس كل عمري ضاع
▪️▪️▪️▪️▪️
يبويه الحسن هذا وهذا الحسين
يودعونك اشوف بدمعة العين
اروح ليا كتر وانطي الوجه وين
اذا بينك وبيني اتحتّم البين
بعذاب الانقطاع
احس كل عمري ضاع
▪️▪️▪️▪️▪️
تصد عينك بعيني ودمعك يسيل
اشوفك للمنية عيونك تميل
بعد ما بيك قوه لأيدك تشيل
وداعك صار نظره تهدّم الحيل
خبر للغَيَبه شاع
احس كل عمري ضاع
▪️▪️▪️▪️▪️
أنه زينب يبويه ودمعي سچاب
متت من نار جرحك والگلب ذاب
غفت عينك شفتها وصار الغياب
رحت من بين ادية لتحت التراب
جروحك بتّساع
احس كل عمري ضاع
▪️▪️▪️▪️▪️
متت بويه وعفتنه واظلم البيت
اموت وياك يا حيدر تمنّيت
بنعش شالوك وابچي دموم ظليت
خذت روحي وحزن وجروح خليت
بغدر أهل الخداع
احس كل عمري ضاع
▪️▪️▪️▪️▪️