قصيدة : محبوبي يا رب طاح
للشاعر : حسام الحمزاوي
: ليلة 20 رمضان 1446 هـ
المناسبة: ليالي استشهاد الامام علي (ع)
:حسينية و موكب أم الحسن ع البصرة قضاء الفاو
محبوبي يارب طاح
من ايدي لإيدك راح
حامي جاره
الما خله بعيني العيد
ياريته ابشل العيد
وظلمة داره
بآخر نظرة .. انطاني ظهره
▪️▪️▪️▪️▪️
يارب علي تدري بعلي خيمة يتامه
شگد حاولوا لكن بقى الأول كلامه
شافوا علي راسه رفض تاج الزعامة
غدروا لأن شال الوطن فوگ العمامة
حيدر درس للما فهم معنى السلامة
خله الأسد حارس على أملاك الحمامة
من چفه حتى الطير
بجناحه يشوف الخير
من أدينه
الدنيه يخربها الموت
بلا والد چن تابوت
مو حنينة
البيه گمرة .. انطاني ظهره
▪️▪️▪️▪️▪️
دنياه صفت حب وحرب ما مشتريها
عنده العدل چن مسطرة ولا زلة بيها
يوسف زليخه عشگته بنزوة حجيها
قدت قميصه بس رجع زود بچيها
والدنيه من عشگت علي ما رد عليها
مدت اديها لحيدره و گطع اديها
عاشگته بحب سنين
طلگها برمشة عين
من رماها
رخصها وعمره شاب
قالعها قلع الباب
ما هوها
وآنا انتظره .. انطاني ظهره
▪️▪️▪️▪️▪️
فگد الابو كسرة ظهر وبچف زماني
راح الگبل ليه سند ما عندي ثاني
عشرة عمر ما تنسي جروح الثواني
تحت الترب بيدي ادفنت خيمة حناني
يا هو الـ إلي بعد الابو راح ونساني
ويه الأبو شمحله الگبر لو موتي جاني
ويانه چان اخيام
بس غمض صرنه ايتام
ويه الشماته
ما رجع سائل يوم
حتى السيف المسموم
من صلاته
بروحي الجمرة .. انطاني ظهره
▪️▪️▪️▪️▪️
فگد الأبو ثلمة أهل من ما يجيهم
صعبة الابو من يحتضر وعيونه بيهم
آخر نفس غمض علي يهضم حجيهم
بس مختنگ من البجي ما هد اديهم
وبدمعتي وي اخوتي اسمع بجيهم
غمض لجن حيدر بقه خايف عليهم
عايفنه واحنه زغار
عافلنه دم بالدار
ما سلمنه
وصاهم من الهام
هذا الدم حد الشام
من أهلنه
بهاي الكسرة .. انطاني ظهره
▪️▪️▪️▪️▪️
من طبرتك زينب آنه صرت الغريبة
حتى الحزن هم ينكتب كلمن نصيبه
هو الأبو خيمة اذا طاحت مصيبة
ياهو البعد بيه يحس يمك قريبة
دنيه شكثر بيها ألم دنيه عجيبة
واصعب جرح بيد المحب يدفن حبيبه
العاشرني صار اسنين
خلاني وسد العين
ما عذرته
يوميه اعزاز تروح
والعايش ظل مذبوح
من دمعته
العمري بعمره .. انطاني ظهره
▪️▪️▪️▪️▪️
ما تنسي أيام الزغر من چف حنانه
من الزغر مثل الجبل ساند گفانه
وجهه تعب بس يبتسم يكسب رضانه
عشنه ملوك ابسوفته بمشي ورانه
جاب العمر چفه شكثر حارب زمانه
شگد صعبة لمن تلتفت وخالي مكانه
دنيانه غابة ناس
محتاجه چف عباس
للنذالة
الما عنده والد صار
يطعنونه بس يندار
هذا حاله
شبيدي لأمره .. انطاني ظهره
▪️▪️▪️▪️▪️
تاريخه سجل موقف الناس التوده
مستشهد وأول بقه الوادم تعده
من شيعوا نعشه انعرف ياهو اليضده
وين البقت من الحرب سطره اعله خده
مو عالمتن نعشه انرفع للسبعه حده
والما حضر نعشه طلع گاضيها شرده
والجنة چنها اخيام
مخلوقة للخدام
ما نسانه
الما عنده داحي الباب
ما يشتم هذا الهاب
من هوانه
بس بگبره .. انطاني ظهره
▪️▪️▪️▪️▪️
رد مع اقتباس