قصيدة : اشدد حيازيمك يابو حسين
للشاعر : حسين مردان البديري
: ليلة 19 رمضان 1446 هـ
:حسينية و موكب أم الحسن ع البصرة قضاء الفاو


إشدُد حَيازِيمك يبو حْسِينْ
هالليله واصِل يمّك البِيَنْ
▪️▪️▪️▪️▪️
يا فارِس السَّبعَه اوْ كفُو الوادِمْ
بالطَبْرَه بس ربّك تره العالِمْ
لا ما تِرِد يابالحسَن سالِمْ
راسَك يويلي صار نُصينْ
▪️▪️▪️▪️▪️
ابّيت الله اْجيت اوْ تِرحَل ابّيتَه
كِلشِي تِمِلْكَه لْربّك انْطيتَه
بالطَبْرَه صُوتَك حيل علّيته
( فزتُ وربِّ الكَعْبَه ) هالحِينْ
▪️▪️▪️▪️▪️
خيرَك مُطَر علوادِم الفُقرَه
لاكِنْ جزاءَك ياعلي الطَبْرَه
بِالجَنّه راح اتْنُطْرَك الزَّهْرَه
مِنتَظرَه جَيْتَك كِل هلسْنينْ
▪️▪️▪️▪️▪️
يلّي ابْصِفاتَك أوْحَد اوْ واحِد
هلليلَه كِلشي لْمُوتَك ايْشاهِد
الله يِعين اليِحْسِبَك والِد
الله يساعِدها المَساكِينْ
▪️▪️▪️▪️▪️
موتَك يحيدَر هلمِسَه عِندَك
واحبابَك انتَه يمّك اتْسِندَك
بس يا ألَم باچِر يِجي لْوِلدَك ؟
ولْيا طَرِيق اوْ نَكْبَهْ ماشِينْ
▪️▪️▪️▪️▪️
اهْواي المُصايِب مُو فقط وِحدَه
والحَسَن عگبَك يا ألمْ عِنْدَه
إلسِّم يحيدَر يوصَل لْچبْدَه
وايْصِير بعدَك بس للوْنينْ
▪️▪️▪️▪️▪️
امّا الحُسَيْنِ امْصيبِتَه اچبِيْرَه
بالطَّف غَريبْ اوْ ما إلَه ديْرَه
عالشَّط لاخيّه ناظِرَه ايْدِيْرَه
تِجْرَحْ يحيدَر قُصّة احسِيَنْ!
▪️▪️▪️▪️▪️
ابوذيات : بهاماك ، بلا دار ، فزت بي
للشاعر : ناظم الحاشي


علي ماچانت الدنيه بَهاماك
إوخِتَم للاخره بدمك بهاماك
إنطُبَر هام النبي الليله بهاماك
إونَزف دَم النبي ودمّك سويه
▪️▪️▪️▪️▪️
بِلاء الحزن بفراگك بَلا دار
بينه وضلّت الدنيه بلا دار
علي أيتامك بعد دارك بَلا دار
إو بَلا حامي يَحمّاي الحميه
▪️▪️▪️▪️▪️
على آذان الفجر صوتك فزت بي
الشيعها اوموتها إبموتك فزت بي
إذا موتك علي الليله فِزت بي
خسرنه اوخسرتك كل البريه
▪️▪️▪️▪️▪️