قصيدة : عظيمه والله بالمحكم شهد
للشاعر : عبداللطيف خالدي
: ليلة 10 رمضان 1437 هـ
: بئر حسن - لبنان
طور : #وداعا_يا_علي

عظيمة .. والله بالمُحكَم شِـهَـد
خديجة .. انتي للهادي السنَد
▪️▪️▪️▪️▪️
مِن بِعَث ربنه مُحمد اُو خِتَم بيه المُرسلين
وابتدت حرب الضلالة للنبي اْمن المُشركين
ما سِنَد هاي الرِسالة اُو ناصَر الحق المُبين
إلا بَذلِچ يا خديجة اُو سيف أمير المؤمنين
ابعطائچ .. دِين بارينه صُمَد
خديجة .. انتي للهادي السنَد
▪️▪️▪️▪️▪️
عن نِـسـاء الهادي چنتي يا جليله اْمقَدَمه
وعِشتي بأول لحظه نِزلت آية من رب السِمَه
يا خـديـجـة وربنا قَـرّر يِـرزِقِـچ هالمَكرُمَه
اْبرحمچ السِر الإلهي يالحملتي ابفاطمه
تَبارك .. وَالِـــدٌ ومــا وَلَـــد
خديجة .. انتي للهادي السنَد
▪️▪️▪️▪️▪️
عِشتي ويّ الهادي قُصة تُكتَب ابماء الذَهَبْ
وابرغم تَعْب الرسالة، اْبدارِچ اْيزول التَعَبْ
الهسبب الله ابجلاله أكرَمِچ بأعلى الرُتَبْ
اُو بِعَث ويْ جِبريل كِلمه واهي اْبحقچ مو عَجَبْ
تـحـيّـة .. يا عظيمة اْمن الأَحَد
خديجة .. انتي للهادي السنَد
▪️▪️▪️▪️▪️
مِـن دِنَـت ليچ المِنيّه اْبگلُب طـاهِـر مُطمَئِنْ
مو يِتيمه فقط عِفتي، ابفرقِتِچ تِبچي وتِوِّن
مِنكِسِر ظهر الرسالة لو نِظرتي بالدَفِنْ
يوم ما يِكفي المُصابچ، فَرقِتِچ “عام الحِزِنْ”
مُحَمَد .. بَـدِر مِن ليله انفُگد
خديجة .. انتي للهادي السنَد
▪️▪️▪️▪️▪️
مِن جِنان الـبـاري لَجلِچ چِفَن عالهادي نِزَل
ونازع ابروحه اْمن اِجالچ وانتي فوق المُغتَسَل
تِـنـطِـق احزانه اْبـرِحيلِچ مِن دمع جفنه الهِمَل
اُو من رحلتي عن محمد چنه نُص عُمره رحل
المدامع .. تِجري و اِيتيه العدد
خديجة .. انتي للهادي السنَد
▪️▪️▪️▪️▪️
خِيرَه ما عِشتي ونِظَرتي بَعدِچ اْشصار اُو جِرَه
اْنگلبَت اَصحاب السَقيفة وعالوُصي مِـتـآمِـره
حـاوطـوا دار الـرسـالـة والزچـيّـه امحيّره
باب وحي الله يـَ وسفه نار بيه اْموَجَره
جهاراً .. جيش شيطاني حِشَد
خديجة .. انتي للهادي السنَد
▪️▪️▪️▪️▪️
وسفه بِنتِچ ياخديجة اْعليها من جار الوَضِع
بـاب يِستأذِنَه الهادي اْبحِقِد طاغي يِندِفِع
خَد رسول الله اعله خدها چان لمّن يِنصِفِع
ومخزن آيات الجلالة يِنكِسِر منها الضِلِع
ضِلِعها .. يِشكي من جُور الجِحَد
خديجة .. انتي للهادي السند
▪️▪️▪️▪️▪️