قصيدة : يا مهدينا الوعد وينه
كلمات : جابر الكاظمي
اصدار : #اين_الطالب

يمهدينه الوعد وينه
الوعد وينه يمهدينه
▪️▪️▪️▪️▪️
كل عاشگ يظل يتنطر ابلهفة
من ايغيب عن عينه وجه ولفه
يا بسمة عمر ما لاحت الشفة
ويا جمرة صبر لا تشب لا تطفه
الصبر فتنه اشكثر متنه
وترجينه يامهدينه
▪️▪️▪️▪️▪️
نتأمل بشير الفرج إلنه يعود
بيده ابشارة عن طلعتك يالموعود
للعاشگ يگولون الصبر مريود
گلت لابد نهاية للصبر وحدود
تأملنه وتحملنه
مآسينه يامهدينا
▪️▪️▪️▪️▪️
ابميدان العمر تتسابگ الأيام
يوم ايعگب يوم وعام يخلف عام
يبن الحسن واحنه انعيش بالأحلام
ما غير السراب يوالف الأوهام
المحب عايش على الهامش
گضه اسنينه يمهدينه
▪️▪️▪️▪️▪️
اشتنه الصبر واسگيناه بالدمعة
يا حسرة بذرنه الما طلع زرعه
ابهذا الوصف نرجه الغيبتك رجعة
ليالينه انطفن شمعة ابأثر شمعة
صفت ظلمة ولا نجمة
ابليالنه يمهدينه
▪️▪️▪️▪️▪️
حبيب اللي يعيش ابفرگة المحبوب
شما طالت اسنينه عمره ما محسوب
واحنه اصبرنه بفراگاك صبر أيوب
هم هذا عمر يتسمه يالمحجوب
ابنوايبنه الوكت ذنبه
اشيظل بينه يمهدينه
▪️▪️▪️▪️▪️
انگطع خيط الملامة وطفح غيض الروح
ما عدنه اليعمر عمر جدك نوح
يا مگصر عمرنه الينتهي ويروح
اشنعد من هجرك لو نعد اجروح
بهضم طحنه وألف محنه
دنت لينه يمهدينه
▪️▪️▪️▪️▪️
ارواح التودك گطع حاديها
ما ندري اعله منوى يوديها
الهضم عگبك يصبحها ويماسيها
ولون همها على الاطواد يحميها
ثجيل الهم علينه إلتم
اشينجينه يمهدينه
▪️▪️▪️▪️▪️