قصيدة : يمهدينا الضلع
كلمات : جابر الكاظمي
اصدار : #اين_الطالب

يا مهدينا الضلع .. ما ننسه ثاره
وعلي جدك علي .. هجموا لداره
▪️▪️▪️▪️▪️
يا روح الإنسانية سرك سر التوحيد
يالبايعناك بدمنه مو بيعة أيد بأيد
شما يكثر دمع الموعد أكثر محنتنه تزيد
منك يالغايب منك تدري وتعلم شنريد
تثور على الغصب .. حق الامارة
تنشده بيا ضلع .. ملتهبة ناره
وعلي جدك علي .. هجموا لداره
▪️▪️▪️▪️▪️
يا من كسروا ضلع أمك بالحايط والمسمار
گوم أنشد يا هو الي طايح يم عتبة باب الدار
حلمك چم دوب وصبرك ننتظره ليل نهار
يمته خيولك تسرجها وتصيح الثار الثار
أناشد عالفرج .. يمته البشارة
أظن حتى الصخر .. مل أنتظاره
وعلي جدك علي .. هجموا لداره
▪️▪️▪️▪️▪️
بعيونك دمعة آدم بقلبك لوعة يعقوب
وبصدرك شهگة يونس يالصبرك صبر ايوب
الصخرة تذوب بحسراتك وقلبك صابر ميذوب
شتنسه الزهرة ولوعتها لو محسن يالمحجوب
إلك جفن المحب .. دمعه يتجاره
يشوبح على الفرج .. ليله ونهاره
وعلي جدك علي .. هجموا لداره
▪️▪️▪️▪️▪️
مصابك يالمهدي مصابك ما مثله يصير مصاب
نثروا صفحات سنينك واحترگت ويه الباب
جدول أحزانك يجري وظل ينزف بالمحراب
ما بين الزهرة وحيدر صواب أعظم من صواب
انغصب من الوصي .. تاج الوزارة
وصفت عند الخصم .. ذيج الصدارة
وعلي جدك علي .. هجموا لداره
▪️▪️▪️▪️▪️
من غصبوا جدك حيدر ضاع الحگ والاصلاح
عافوا نبراس الحكمة وتبعوا حكم الأشباح
جدك طاح بمحرابه غدروه وراح الراح
يالغايب أنشد وأسمع دم الكرار اشصاح
هتف وين القيم .. وين الحضارة
رجع حكم الجهل .. هاي الخسارة
وعلي جدك علي .. هجموا لداره
▪️▪️▪️▪️▪️
يالغايب وأنت مصابك صار اليوم مصابين
يا نار اللي تطفيها وأنت بگلبك نارين
ياهي التگدر تحملها وتشخص عينك لاوين
جرح الباب الدفعوها لو طبرة سيف البين
كسر ذاك الضلع .. صعبة انجباره
وتظل طبرة علي .. تجري بغزارة
وعلي جدك علي .. هجموا لداره
▪️▪️▪️▪️▪️
أنشد من دمعة عيني ومن دلالي المجبور
تلهب نارك عالطبرة لو عالضلع المكسور
يا يوم إتجرد سيفك عالطغيان و عالجور
يا يوم وشمسك تطلع وانشاهد ذاك النور
تدفعك للنصر .. بهمة وجدارة
تثور وللكفر .. تعلن دماره
وعلي جدك علي .. هجموا لداره
▪️▪️▪️▪️▪️