: اين الطالب بدم المقتول
كلمات : جابر الكاظمي
اصدار : #اين_الطالب

أينَ الطالبُ بدمِ المقتولِ بكربلاء
▪️▪️▪️▪️▪️
صارت هاي الامه ابريبه
تصرخ ومصيبتها مصيبه
ميعاد الغايب شيجيبه
يايوم ايعود من الغيبه
أينَ الغائبٌ أينَ الوارثُ للأنبياء
أينَ الطالبُ بدمِ المقتولِ بكربلاء
▪️▪️▪️▪️▪️
يايوم الغايب يحضرنه
وبشارة خير ايبشرنه
وعن ثار حسين ايخبرنه
نمسي ونصبح عالهم صرنه
نبكي لمصاب السبط صباحاً ومساء
أينَ الطالبُ بدمِ المقتولِ بكربلاء
▪️▪️▪️▪️▪️
ما نتحمل نار افراگه
يمته اويه الغايب نتلاگه
ليش اتأخر شنهو العاگه
وما لوّح صهوة سبّاگه
أينَ الموعودُ بطلعتِهِ حانَ اللقاء
أينَ الطالبُ بدمِ المقتولِ بكربلاء
▪️▪️▪️▪️▪️
وين اليصعد ظهر الأدهم
يگصد للطف ويتوزم
من هاي اللوعة وهذا الهم
ثهلان ايمور ويتهدم
أينَ وليُّ اللهِ وأينَ بَابُ الرجاء
أينَ الطالبُ بدمِ المقتولِ بكربلاء
▪️▪️▪️▪️▪️
وين اللي يشحذ بتاره
ويصرخ بسم حسين وثاره
وثاره أهل البيت وأنصاره
ايثور اعله الكَوم الغداره
هَذَا نَحْرُ حُسَيْنٍ تَجْرِي مِنْهُ الدِّمَاءُ
أينَ الطالبُ بدمِ المقتولِ بكربلاء
▪️▪️▪️▪️▪️
وين اليملك شيمه وهمه
ايشيل حسين ويدفن جسمه
بالمصرع ماواحد يمه
مذبوح ومخضوب ابدمه
وَدَماً تَبْكِيهِ لِمَقْتَلِهِ عَيْنُ السَّمَاء
أينَ الطالبُ بدمِ المقتولِ بكربلاء
▪️▪️▪️▪️▪️
وين اليرزم غوجه ويشرع
ويشيل حسين من المصرع
جسمه اعله التربان اموزَّع
وبحد الأشفار امگطَّع
لَوَ نَبْكِيهِ بِدَمٍ لَا يَنْفَعُنَا الْبُكَاء
أينَ الطالبُ بدمِ المقتولِ بكربلاء
▪️▪️▪️▪️▪️
وين الملزوم ابعسّاله
ايلوح الغارب يتعناله
ويشوف حسين ابيا حاله
مسلوب اجفن برماله
يَوْمُكَ يَوْمٌ لَا يُحْتَمَلُ يَا عَاشُورَاءُ
أينَ الطالبُ بدمِ المقتولِ بكربلاء
▪️▪️▪️▪️▪️
جسمه بذاري الموت امعفر
وبسمر الخِطِّيه امشجر
وين اليتعناله ويحضر
يصرح يا محزوز المنحر
وَيُنَادِي يَا سِبْطَ مُحَمَّد حَانَ الْعَزَاء
أينَ الطالبُ بدمِ المقتولِ بكربلاء
▪️▪️▪️▪️▪️
وين المذخور اليلفينه
وبمصاب حسين ايواسينه
يصرخ صرخة بدمعة عينه
وين الاكبر جاسم وينه
أينَ كفوفُ البَدرِ تَهاوَت أينَ اللواء
أينَ الطالبُ بدمِ المقتولِ بكربلاء
▪️▪️▪️▪️▪️