قصيدة: قلب الوفا
للشاعر: حيدر طلاق
المناسبة: ولادة الامام المهدي عج
اصدار: ريحانه

گلب الوفه إينادي .. بالبُشره مملوك
يا بضعة الهادي .. بالمهدي مبروك
رابع عشر طاهر إبنوره القمر زاهر
و صوت الفرح ظاهر بالمهدي مبروك

كل العوالم تسبيح تتجاره فرحتها
و أشجار الأعياد اليوم سامره منبتها
شمس الأرض هاي أنوار مهدينه كسفتها
روح التباريك إتطوف و الزهره كعبتها
تحلالج السهره .. هذا البدر لاح
يا فاطمه الزهره .. دامت هالأفراح
بالمهدي مولانه هالليله ويانه
يالزهره فرحانه بالمهدي مبروك

عندج يزهره الانشاد يتواله ونسمعه
فرحه وتغاريد طوير هالليلة مجتمعه
هذا الحسن ويه حسين وابنائه التسعة
كامل عددهم هاليوم بالمهدي يالبضعة
منواجد المهدي .. ما بين الابدور
فرحة علي تبدي .. من وجهه بالنوره
طه بثغر باسم يحجي مع القائم
وينادي يا فاطم بالمهدي مبروك

حين إنولد راعي الثار فاح العطر منه
جوده انتشر عالأكوان و الشيعه تتغنه
الله إجتمع بالأملاك وصاها تتعنه
تگصد تهني الأطهار و إتزين الجنه
رسمت صور توضي .. بالبسمة الأملاك
بالعالم العلوي .. و عمت بالأفلاك
جن و إنس بيها تتلگه مهديها
و الورده بيديها بالمهدي مبروك

عدنه مكاتيب أفراح للزهره مكتوبه
بيها التهاني عنوان بالبهجه مصحوبه
قلب الموالي المسرور هايم إبمحبوبه
بالفرحه يرضي الزهراء كل هذا مطلوبه
قول النبي إنسمعه .. كلماته آيات
من يسعد البضعه .. يحصد كرامات
و المهدي ميلاده شملتنه أعياده
يا زهرة الساده بالمهدي مبروك

هذا الأمل و المذخور للكلفه و الشده
سيفه ينكس كل جور ينشر عدل جده
إيغيب و تظل الأكوان تترقب الوعده
شوفه المحب يتمناه لو لحظه بس وده
و الزهره تتنطر .. غايبها موعود
تترقبه يظهر .. و الشيعته إيعود
راياته نتناها لو صار و شفناها
نصرخ يبت طه بالمهدي مبروك