ـــــــــــــــــــــــــ ـــــــــــــــــــــــــ ــــــ
القصيدة: يَا مفزعي
أداء:محمّدبَاقِر الخَاقانيّ
كلمات: كرّار المحمّداوي
ـــــــــــــــــــــــــ ـــــــــــــــــــــــــ ـــــ
يا مَفزعي في كُربتي واهوالي
قوّي علىٰ طَف كربلاء حيلي العَليل وحالي
ـــــــــــــــــــــــــ ـــــــــــــــــــــــــ ــــــ
يا سيّدي.. ويّ والدي
عِندي سَفر مِن الوطن
وادعي ب امل.. تشفيني خَل
احزم رچابي ويّ الظَعن
گلب حاير يَربّ وبالمخاوف ضاع
دعيتك يَـ الكريم المّا تردّلك داع
سَفر إكتبلي باچر لا تكتبلي وداع
وهَب لي مِن لَدُنّك للرَواح متاع
إرزق گلب.. سَفرة بدرب ويّ ظعن ابوه الغالي
قوّي علىٰ طَف كربلاء حيلي العَليل وحالي
ـــــــــــــــــــــــــ ـــــــــــــــــــــــــ ــــــ
دَمعي يِهل.. ليك ابتهل
يا ربِّ والسفرة الفَجر
متمرّضة.. وليلي گضه
مرّة احزن ومرّة ابتشر
مرّة اتفائل ومرّات اصب العين
واصارع بالسؤال وحَلّه اجيبه منين
اگولن مرّة اروحن ويّ ابوي حسين
ومرّة يگلي ظنّي وياه ما تَرحين
رَب يا علي.. بهودج هَلي اأذن إلي بترحالي
قوّي علىٰ طَف كربلاء حيلي العَليل وحالي
ـــــــــــــــــــــــــ ـــــــــــــــــــــــــ ــــــ
بخدّي الدَمع.. يشرح وَضع
طِفلة الهجر يمّها إقترب
ما يخفىٰ عَن.. عِلمك ب إن
تموت الحَنينة التفگد اب !
واخافن عِلّتي تصير السَبب واضطر
بممشه اجدامي عَن ممشاهم اتأخّر
واخاف يشوفني شِلون بمَشيتي اعثر
اريدن حيل حتّىٰ إعله السَفر اگدر
اعوذُ بِك.. لا انترك وَحّدي ببيتي الخَالي
قوّي علىٰ طَف كربلاء حيلي العَليل وحالي
ـــــــــــــــــــــــــ ـــــــــــــــــــــــــ ــــــ
يا عُدّتي.. في شدّتي
لو ما اخَذني بيك اعوذ
مِن موادعه.. بغير الدَعه
ب إسمك بمِن يا رب الوذ
إذا لا سَامح الله وگال إبقي هنا
وإذا مِن عندها لا بُد مِن فرگته الارجاه
يا اللهُ يا اللهُ يا اللهُ يا الله
إخذني إن چان باچر ما اخَذني وِياه
اهونلي اموت.. ولا بالسكوت يِرحل رَبيع آمالي
قوّي علىٰ طَف كربلاء حيلي العَليل وحالي
ـــــــــــــــــــــــــ ـــــــــــــــــــــــــ ــــــ
حَل الفجر.. وآنه انتظر
حَل للمُصاب البي انا
حَان الوقت.. وتحضّرت
ولَن والدي لبابي إعتنىٰ
طُلعت وشفت ابوي بهمّه متقصّد
يروح گبال بابي بحيرته ويِرد
إذا رايدني اروحن ليش متردّد
وبمسحة يمينه بهامتي شيقصد؟
وتَالي رَحل.. عنّي وذِبل غصني ودَمعتي تلالي
قوّي علىٰ طَف كربلاء حيلي العَليل وحالي
ـــــــــــــــــــــــــ ـــــــــــــــــــــــــ ــــــ


م