هنا

[أنثى حائرة]

انا بنت في بداية العشرينات احس امي ما تحبني و دايما تبخل عني بابسط الاشياء تحسسني اني ما استاهل و كلشي تعطيني اياه بمنية و تعايرني بيه قرن و تضل تحجي عليه اذا صرفت حتى لو الف دينار و دايما تريد تزوجني باي طريقه كانت حتى لو رجال جبير او شخص قبيح قبيح استغفر الله على هلكلمة بس شخص ابو بنات و قبيح الهيئة و الاخلاق وتسميني العانس و اني بنت حلوة وعندي شهادة عالية لكن هي دايما تكلي الله يخلصني منك و من مصاريفك للعلم مصاريفي جدا قليلة هي ما تبخل على اخواني وتعطيهم اضعاف وما تكول شي بس من توصل لي يصير الالف له قيمه تعبت ونفسيتي مدمرة جدا من هذا الموضوع ما اعرف شنو اسوي

[المستشار القانوني]

بسم الله الرحمن الرحيم..وبالوالدين إحسانا..
مهما تكن الوالدة قاسية بالتعامل مستحيل تكره ابنائها أو بناتها.. ربما ضغوط الحياة والمعيشة تجبرها على القسوةمعك...حاولي تكسبينها وتتفاهمين وياهه ..نسأل الله أن يهديها لك اكثر وأكثر .

[أبو ملاك]

حاولي.. تشتغلين وتعتمدين على نفسج..

[نائل الكناني]

ميخالف مع ذلك بريها واحسني اليها وعينك بعين الله مثلما يقولون وادعي لله واتوسلي اليه بأحب خلقه اليه الزهراء ع وذريتها ان تتأهلي اي تتزوجي وتصبحين مستقله لكن اياكي وعقوق والدتك فانها من كبائر الذنوب وحاولي جهد امكانك تحصيل رضاها وودها واجرك عند الله عظيم لو صبرتي واحتسبتي وتذكري بأن هذا برك سوف يعاد لك حينما تتزوجين ويكون لك ابناء ثقي لانها عدالة السماء وكما تفعل يفعل بك مستقبلا والله يوفقك

[علق]

بما انج عشرينيه فانتي حاليا بمرحله مفصليه من حياتج ورح تتلخبط عند كثير من المفاهيم فاول شي اعتني بنفسج اعتني بمشاعرج ،، حبي نفسج وأكثري من مدح نفسج ومكافئته بابسط الاشياء ،، امج حاليا مستثقله مصروفج من تنجحين وتوصلين مرحله رح تحطج فوگ راسه ورح تستعز بيج وما رح تفرط بيج ،،

طبعا انتي حاليا اكيد تدعين عليه وما تگدرين تسامحينه واضح جدا فيكون الجزاء من جنس العمل فطبيعي انو من تشوفين كره رح تكون النتيجة كره ..


بس ماذا لو ،،

امج ما اله دخل باي شي ديصير وياج ،،
فمثلا مو امج البخيلة انتي اللي بخيلة على نفسج في مكان ما في موضع ما ،،
ماذا لو انتي اللي چنتي مسرفه اكثر من اللازم في مكان ما في موضع ما ،،
وما في داخلج خله هذا الانعكاس اللي بداخلج طلع بامج حتى تتصححين ذاك المكان أو الموضع اللي انتي ما ممنتبهتله وتكونين متطرفه بيه اما بالبخل أو الاسراف على نفسج
يا أيها الذين آمنو عليكم انفسكم
صدگيني صدگيني
ماكو شي بالخارج كله القصه اللي تشوفينه هي تخص روحچ وكل اللي بالخارج يسلطون الضوء على نقاط معينه بنفسج حتى تصححينه ،،

وكوني على يقين
اذا تزوجتي حتى تهربين من امج حيكون الشخص اللي تزوجتي هو نسخه ثانية لامج
لان الرسالة واضحه صححي نقاط معينه عندج
وحتى صفه الجمال / انتي دتشوفين نفسج قبيحه في موضع ما ،، ما اقصد شكل حصرا يجوز تصرف ، يجوز سلوك أو اي شي آخر ،،

اسألي نفسج
اني وين بخيله على نفسي
اني وين اشوف نفسي مو جميله
هل اني مسرفه في مكان ما



نرجع نگول انتي عشرينيه
وقت انفصال طاقي عن امج وابوج ،، ورح تشوفين كل الأمور أكبر من حجمه الأصلي ب 10 مرات
وشكرا .

[حفيدة حمورابي]

عاتي حبي ماكو بيت بدون مشاكل
طكني واطكك يوم تحبج ويوم تكرهج من تحبج سلتي منهه مصاري
باليوم التكرهج نضفي البيت وطبخي ورتبي نفسج تشوفج كامله مكمله تحبج

بما عندج شهاده وشهادتج عاليه دوري شغل واشتغلي ع نفسج وبعد متحتاجيهه
واذا هربتي منهه للزواج يطلع الله غاضب عليه وياذيج اكثر من امج
وانتي حاليا مرحله صعبه متعرفين شتردين الينصحج تعتبريه يكرهج



ابد اني مو بالعشرين

[مؤرفين 'ۦ ']

اول شي حاولي تقللين طلباتج منها قد ما تكدرين حتى لا تفتح عليج سالفه المصاريف اذا تكدرين تشتغلين لو تلقين مصدر دخل بسيط يصير احسن ثاني شي لا تخلينها تضغط عليج بموضوع الزواج هذا قرارج وحياتج انتي مو لعبه بيدها حتى تزوجج لاي شخص بس لانها تريد تتخلص منج لا تقبلين الا بشخص يناسبج ثالث شي اذا تقدرين تحجين وياها وتفهمين ليش هي تعاملج بهالطريقه جربي يمكن تكتشفين سبب يخليها هيجي رابع شي حاولي تلاقين شخص ترتاحين تحجين وياه مثل اختج صديقتج او اي احد قريب عليج حتى لا تبقين وحدج بهالضغط
خامس شي واللي هو الاهم لا تخلي كلامها يكسرج انتي بنوته وعندج شهاده ومستقبلج قدامج لا تسمحين لاي احد يحسسج انه انتي عبء او بدون قيمه اثبتي نفسج وعيشي حياتج مثل ما تستاهلين

[علي الاسدي**]

اكيد انتي حساسه اكثر من الازم ماكو ام تكره بنتها بس خطيه امج يمكن الضروف اصعب منها
لا تخلين تفكيرج يروح بهذا الاتجاه وان شاء الله يوم ويكون عندج ابن حلال وبيت وتتغير الاحوال للاحسن