القصيدة: بالك تنجفي النعمه
أداء: مسلم الوائلي
كلمات: علي الأكبر الغرابي
~~~
يالرايد تصير خادم للحسين
مني استمع زين ذني الجلمتين
~~~~~~
فكلي عيون گلبك زين وفهم يالگلت فاهم
لا تسمع القال وقيل وصير بخدمتك حازم
اطيح ماي وجهك كون لو رايد تظل خادم
عبره ودرس تاخذ كون من شيخ الزلم جاسم
لو رايد تعيش بالخدمه دارين
مني استمع زين ذني الجلمتين
~~~~~
مو قصدي أرد احرجك جاي شاب وافتهم وضعك
بس سولفلي بيش يفيد لغير حسين كل دمعك
اترك مغريات الناس باجر محد ينفعك
ياهو يرفعك من اطيح جف حسين لو ربعك
لو عافك حسين تنطي الوجه وين
مني استمع زين ذني الجلمتين
~~~~~~
لو رايد تعيش بخير واسمك يعله بالخدمه
نعمه من الله تدري حسين بالك تنجفي النعمه
لا تتعله عالوياك وأوزن حجيك وفهمه
جم حمزه الزغير عاش وصاحب بالسمه النجمه
جم خادم المات بس باقي للحين
مني استمع زين ذني الجلمتين
~~~
يبن آدم تهده وشوف وعرف زين تاليتك
ولا تنغر تره بتابوت انته اتنام مو صيتك
لا مالك ينفعك راح لا بيتك واهل بيتك
بس خدمة حسين هناك هيه اتصير ساجيتك
محد ينجيك بس دمعة العين
مني استمع زين ذني الجلمتين
~~~
هيه الناس نفس الناس بس الفرق بالنيه
اول ما تطيح تريد كلها تصيح شعليه
ما تسواش لو ما حسين هاي الدنيه مگضيه
ذوب شما گدرت اتذوب بالخدمه الحسينيه
بس خدمة حسين والباقي فلسين
مني استمع زين ذني الجلمتين
~~~~~~
الراد حسين يلگه حسين اول دمعه بحلامه
واليتبع سراب الناس يبقه بعالم اوهامه
حسين يدور المحروگ گلبه الحرگت اخيامه
حسين يريدك بكل يوم مو بس عشرة ايامه
يسجلهن حسين لو بس دمعتين
مني استمع زين ذني الجلمتين
°°°°°°°°°°°°°°°°°°°°°°°°°
رد مع اقتباس
