(﷽)
قصيدة : عالنهر شاعر
للشاعر : محمد قحطان الرميثي
: وفاة ام البنين (ع)
:ليلة 18 جمادى الأخره 1446
: حسينية ومؤسسة مالك الأشتر - ميسان
طور : #معركة_والنصر_قادم
مِن عَلي ... عالنَّهَر شاعِر
يعتلـــي ... مَنبر العاشِـر
آنــــه أُم الأربعــــه الوَفّــايَّــــةْ
عِندي شاعر عِندَه بالطَّف غايةْ
يكتب الأبيـات فوگـــ الرّايــــةْ
وصار رادوده الفُـرات اِو مايـه
لو كِتَب ... يا شَخُص گادِر؟
يعتلـــي ... مَنبــر العـــاشِـر
كـل قَصيـده ترجِمَت حَسراتـه
والقوافي استسلِمَت يم ذَاتــه
أبني شاعر، والشِّعِـر صـولاتــه
واِرتِجَــز عالعَلگُمي أبيــــاتـــه
صارِمَه ... والقَلَم شاهِر
يعتلـي ... مَنبر العاشِـر
اِبشاعريَّــه مِن خَيــال احزاني
يكتب اَحزانـه اِبشعِر وجـداني
بكل وَزن، كــل قافيـــه تلگاني
أنتحب واتلاهَـــب اِبأَشجــاني
كل حَرُف ... للزمَـــن كاسِر
يعتلـــــي ... مَنبــر العاشِـر
ظامي وبنَظـم القوافي اِيواصِل
والضِّفـاف اِبکل خَجَلها اتساجِل
لو قره ابياتــه الكفيــل الباسِــل
تعتلي الأصوات (اعِـد يالكافِل)
هاشِمي ... يرهِب الناظر
يعتلـــي ... مَنبر العاشِـر
يوسفي اِبطَــف كربلا تدروني
اِو بيَّن اِبيثرب بياض اِعيوني
أبني حاشه ما يخَيب اِظنوني
نادى نفسه عالشِّريعه (هُوني)
ما شِرَب ... وبگلُب شاجِر
يعتلـــي ... مَنبــر العاشِـر
شاعر المَوقف عظيمـه اَسراره
ما يهِــم گطعوا يمينه، اِيساره
أبني مِــن صابــوا إلــه أنظاره
سَهْــم المْثَلَّــث كِتَب أشعــاره
بالحَرَم ... والعِطَش شاعِر
يعتلـــي ... مَنبــر العاشِــر
شاعرِي الخِدْر الفواطـم حارِس
وعندي شيعه بالقوافي اتنافِس
تكتب أشعار بعشگـ مِن عــابِس
وبالشِّعر بان اِو ظِهَر چَم فارِس
بالشِّعر ... يكتب الصاير
يعتلـي ... مَنبر العاشِــر
كل زمن بي مَجلِس اِو بي لاطِم
خادِم اِيمــوت اِو يردلَك خــادِم
ولو كِتَب شـاعــر قصيــده لازِم
تلگه يقراها بحـزن چَم "باسِــم"
وبلَحِن ... يكسر الخاطِر
يعتلـي ... مَنبــر العاشِـر
ابوذيات : نعشها ، اجلها
حرام الدنيا لو راحت نعشها
عطر من كربلا قادم نعشها
الحسين اعله المتن نعشها
ويصيح اردود شيعت الزجية
مية من مشوا والله أجلها
الوفية اليوم وافاها اجلها
علي من النجف يبجي لـ اجلها
انزلج باللحد رايد بديه
رد مع اقتباس
المشاركة الأصلية كتبت بواسطة زهرة اللوتــس
