(﷽)
قصيدة : يل تشيعوني
للشاعر : السيد سعيد الصافي الرميثي
: وفاة ام البنين (ع)
:ليلة 14 جمادى الأخره 1446
: العتبة العباسية المقدسة - كربلاء
طور : #يرسمك_بكائي
يالتشيعوني .. يناس ارحموني
ردت تدفنوني .. بجوار الحسين
وينه البي رحم يجبر گلب مكسور
عليه الخيل داست وي ظهر عاشور
هم يوم القريتوا بالكتب مذكور
گبلي والدي الشيدت خمس ابدور
كتبت بوصيتي .. رجائي بمنيتي
اموتن خذوني .. بجوار الحسين
شلون يموت ضامي الچان يرويني
عطف كلما يصابحني ويماسيني
هله بأمنا العزيزة من يناديني
وتشرفت ابخدمته أجمل سنيني
عرش قدسي أشوفه .. وأزوره وأطوفه
وأكحل عيوني .. بجوار الحسين
عمري وي وداع حسين ودعته
وليلة من الليالي بالحلم شفته
محني الظهر لازم بيده خاصرته
وتلگيته ابحنان الوالدة احضنته
سياط آل أمية .. تلوت عليه
وأصيح اتركوني .. بجوار الحسين
حلم قصة مصابه ايمرني ليلية
ابسيف الوحشة يذبح كل أمل بيه
يگلي الغالي ما بي بعد كل جية
عساني لا سمعت بصوت ناعيه
يعدد بنيني .. يهيج حنيني
على الما إجوني .. بجوار الحسين
عن مقتل أولادي الناعي ظل يقره
عون وجعفر وعبدالله عالغبرة
وأبو فاضل قطيع اليمنه واليسره
على الغالي سألته وخنگته العبرة
عزيز الوديعة .. ذبيح ورضيعه
يزيد شجوني .. بجوار الحسين
عندي اشظل بعد گلي يناعي البين
والعجل وفاتي خبر ذبح حسين
واليغمض عيوني بعد أجيبه امنين
ابو فاضل عالشاطي بلا چفين
بعد ما بگالي .. اليحن اعله حالي
يريت اذبحوني .. ابجوار الحسين
تمنيت العقيلة ابموتتي يمي
واتهون عليه حسرتي وهمي
صدى صوت الأسمعه تگول يا أمي
بعدني ابحيرتي والنار بخيميي
بعدني وحيدة .. واخوتي بعيدة
واشوف الولوني .. بجوار الحسين
يأم عباس أخبرج والدمع يجري
مسبية بعدني وحايرة بأمري
والحالة النفذ من عدها كل صبري
من شفت آل أمية دخلوا الگبري
صحت يا كفيلي .. يخويه اعتنيلي
يشيعة اذكروني .. بجوار الحسين
وحگ ضلع امج الزهراء يا زينب
حسرات الوسافة ابكل گلب تلهب
اطمأني المرقدج ما واحد اليگرب
يدرون ابعلي الكرار من يغضب
نتاني حفيده .. يأشرلنه بإيده
يگول اتبعوني .. بجوار الحسين
رد مع اقتباس