كلمات قصيدة [ من باب الدار ]
أداء: الحاج باسم الكربلائي
كلمات: الشاعر السيد سعيد الصافي الرميثي
المكان: عزاء شباب بغداد المركزي - بغداد
------------------------------------------------------------------

من باب الدار .. اخذ الأخبار
لو تسأل فضه وتحجيلك يالمهدي اشصار

دار الله و رسوله و مهبط كتابه
رمز عفة الدين وستره وحجابه
ما زال الأثر موجود بأعتابه
يخبرك يا حقود اللي دفع بابه
يا عذر يفيد .. للچان ايريد
يكسر ضلع البضعه ويكسر گلب المختار

فضه السندتها بساعة الطاحت
خبر بس للوصي وأولاده بي باحت
يا مهدي سمعت ام الحسن صاحت
ويا للثار كلمه بالسمه لاحت
ثاري المقصود .. هو الموعود
لمن أمه اتنخت بإسمه اتحشمه اعله الثار

سبحان الجليل الخالق القدر
تظهر فضه ويه المهدي من يظهر
ومن يبدي الحساب ويصعد المنبر
من كسر الضلع حد گطعة المنحر
هذا من اسباب .. غدر الأعراب
الله اليلعن كلمن اسس ظلم الأطهار

إلتجاسر لسانه بلفظة اليهجر
بعد بآل الرسول شلون ما يغدر
واللي يگول اعتذر عن ذنبه يستغفر
الباري بغير عذر الزهره ما يعذر
شرع أحكام .. قتل وإجرام
والهذا اليوم انشاهدها تركت آثار

حقود و معتنيها ايريد يغدرها
بدون احجاب عينه شلون تنظرها
وما ظل ستر غير الباب يسترها
وعلى الحايط تعمد بيده يعصرها
وشيطلب دين .. يقتل روحين
طيحها وطيح محسنها صواب البسمار

يالبسمك تنحت أمك الزهره
قرارك بالحكم يا يوم إلتصدره
عن سطرة وجهها وعينها الحمره
لو كسرة ضلعها وشدة العصره
ثار المجتوف .. وراسه المكشوف
ننتظرك يالصبرك يشبه صبر الكرار

يالماخذ عهد من خالق الكونين
على شجرة الفتنه تصلب الجبتين
تروح الكربلا اتطلع رضيع حسين
من گبر الكفيل اتطلع الچفين
واتشوف أيتام .. تركض واخيام
من هجمت يالمهدي اعليها اخيول الأشرار

يالتگول المصاب الأصعب اعليه
دمه ادموعي تهل من ذكر طاريه
بنتي الزاكيه الراضيه المرضية
اشلون يصير فوگ الهزل مسبية
تدخل للشام .. ويه الظلام
حرمة اگبال ايزيد اتسمعه ايسب حامي الجار