قصيدة : سفينة نجاتي
الرادود : محمد باقر الخاقاني
الشاعر : احمد الهلباوي
ـــــــــــــــــــــــــ ـــــــــــــــــــــــــ ــ
حبك سفينة نجاتي وهذا دمعي
يهل مادامك على البال
والمالي غيرك صلاتي بيهه ادعي
ودخيلك بس الك تنكال
ردني لفطرة اول ماهمت بيك
وانوح بماتم ومن دون ماتم
اكتشفت الحب اسوي كلشي يرضيك
وخدمتك جنه والدنيا جهنم
ياقربان الله ويا ثارات الشريعه
وجروح الزهره التدي بكد ماوسيعه
يااول مدفون بصدره نحط رضيعه
في كربلاء صار وياك الماصاير
وعلا البلاء انت المحتسب الصابر
ـــــــــــــــــــــــــ ـــــــــــــــــــــــــ ــــــــــــــــ
تجرحني نضرة رحمتك
وانت وحدك
بين اقسى بشر بل كون
وبكلبي عل غبره شفتك
وصار خدك
ورماد مخيمك فد لون
صارت من هوان الدنيا مولاي
اسم اختك غريبه وانته عطشان
من يمتى يموت اليطلب الماي
ومن يمتى يلوح الشيب رضعان
ضعن اهلك من يمتى يبات بلا حمايه
وجف عباس يصير من احلام السبايا
وبنت الزهراء تمشي ومافوكاهه رايه
خير النساء بيك انفجعت بل عاشر
وعلا البلاء انت المحتسب الصابر
ـــــــــــــــــــــــــ ـــــــــــــــــــــــــ ـــــــــــــــــ
دخيلك احجيها نوبه ونوبه اتاني
تترجمها دموع العين
لوتحسب الندم توبه نادم اتاني
والله وعزتك يحسين
خذتني الدنيا بس مو خالي الهموم
على ضهرك الضل عل ماي خالي
ويجرني النوح عل ماكدرت تنوح
على الناكه اربعين من اليالي
جي متغرب صرنا نعيش الحب مواساة
وصار اسمك مانحجي الى نكول اويلا
وكل تشيع نحضره نصيح اي واحسيناه
دموعي رثاء وابجي عليك بلا ناصر
وعلا البلاء انت المحتسب الصابر
ـــــــــــــــــــــــــ ـــــــــــــــــــــــــ ـــــــــ
مابين الف ضلمه اشوفك كبال عيني
ياشمعة ضوا الزهراء
وتوضى كلبي بحروفك وصار ديني
البكاء على الخيمه والابكاء
كل هذا السكوت وصفنتي بيك
ويكلولي ونينك ماله والي
اثاريني يبو جروح الوسيعات
افكر بيك بس بصوت عالي
كل ماطخ بعتابك تعلى بصدري ناري
وبكلبي اسمع صيحت ايتام بصحاري
وركضت حرمه تناهد من حر الضهاري
ومن الخباء طلعت مكسورة خاطر
وعلا البلاء انت المحتسب الصابر ـــــــــــــــــــــــــ ـــــــــــــــــــــــــ ـــــــــ
نبضي يدوم بنحيبه لو ذكرتك
يكسرني مصاب ضماك
دمعت غرام ومصيبه بعيني شلتك
واحد لاشريك وياك
ماترهملي اعيش بدون طاريك
وانا اتنفس هوه الله من خلالك
يجن العاقل ويعقل المجنون
هيج مسوي بل وادم جمالك
كل ماارسمك واكف محتي الكامه اشوفك
وابقى ابجيلك ضامي ومتوسد جفوفك
والله يعوفه بدنياه واخرته اليعوفك
ويبقى العزاء لاجلك هليوم وباجر
وعلا البلاء انت المحتسب الصابر ـــــــــــــــــــــــــ ـــــــــــــــــــــــــ ـــــــــ
رد مع اقتباس
