هنا

[ارجع يازمان]

حمد ... ماضل بشر مضمون
بعد لا تحلف ... ولتثق باليحلفون
لازم بالثقه ابهل ناس .. هم اتخلي بيها أظنون!
اذا حريه يوم اتريد .. روح اطلبها من مسجون
حمد ..لتصاحب الأوهام... وتخلي العقل مرهون
شك ابكل حجي الينكال ,, بس لتجذب المجنون!
حمد لتعدد الحبوك
..لو صار العدد .. مليون.
حمد من راح أسولفلك .. لتكلي اشعجب واشلون!
راح اسهل طريقه انطيك..حتى اتطلع المدفون!!
حمد .. جرب وموت ابيوم
حتى اتعرف اليحبون!
أكثرهم ابفاتحتك.. يتلاكون و يضحكون!
وأجمل صوره بالضحكات.. نص فاتحتك ايصورون!
ماتلكه اليذب ويه الدموع .. اعيون ..
ما يبجون
كل ذوله الأجو بالفاتحه ايكشخون!
حمد رايح تضل مطعون,
ترى راحوا يجذبونك .. حتى الراحوا ايدفنون
يكلولك ابصوت الريل,, كل ركابه ميسمعون
ودك اكهوه المن ابعيد,,, بس انت اسمعتها اشلون؟
وليش اتكوول
أشم الهيل!
وانت ابريل
بس دخان!
وبدخانه غطه الكون!
وبدخانه غطه الكون!
حسين االساعدي

[عبير الياسمين]

أكثرهم ابفاتحتك.. يتلاكون و يضحكون!

والله كلامك صحيح
شعر فيه تناغم رائع بين الكلمات
شكرا جزيلا عاشت ايدك