ديرلي بصحتك حبيبي ،
دير بالكاس الجبير .
ديرلي بكاس الدمع بوسة حرير .
الدمع خمر الفقير .
دير من عينك ضوه آينسم عبير .
بارد الكاس العبير ،
فص ثلج جمرة آعيونك .......
ذابيه بماي الشعير .
ديرلي بصحتك حبيبي ،
السمر من غير ما اسكر مثل خبز الفطير
الحزن من غير ما اسكر ، يظل بيه امير .
دير ، ......
كصر الليل بشوية فرح
طيف بعيوني الفرح ، عمره كصير.
في ظهاري الكيظ ، يا في الفرح ، ....
حار وكصير .
ديرلي بصحتك حبيبي
دير بالكاس الجبير
ديرلي بكاس الدمع كذلة حرير.
خلي آشوف الدنيا با لمكلوب مرة ،
خلي أشوف المايصير .
خلي أبحث عن أصابيع البديه ،....
وآخف من تسمه أطير .
دير ، .....
طفي الذاكره المشتعله بيه ،
دير ، ........
نسيني وجع بالروح ، بير ،
كل وجع بغداد بيه ،
موعة الكحله ورمد عين الشواطي .......
إيبات بيه ،
خوف اطفال ألعراق آيبات بيه ،
السجاجين القديمه النرجسيه .......
آتبات بيه ،
المقابر والدموع الشاعريه .
كل شي ماخذني آمن آديه .
ديرلي بصحتك حبيبي ،
دير ،.....
يلكاسك رشا ولوعاتي بير .
خل يهزني الوجع بالوحشه وتر ،
خلي شهكاتي يصيرن لي سرير.
وآنت يمي يا حبيبي ،
الوجع والشهكه موسيقى وسرير ،
آتا والنجمه ننام آبفد سرير .
وآنت يمي ياحبيبي ،
الليل موسيقى وحرير
..........................
.............................
الشاعرعبدالكريم القصاب
رد مع اقتباس
