بالمختصر معلومات عن نظام الانتساب في العراق ٢٠٢٤ ٢٠٢٥
نظام الدوام الانتساب :
مقدمة تعريفية عن الانتساب.
الايجابيات الخاصه بالانتساب.
السلبيات الخاصه بالانتساب.
خلاصه الانتساب.
الدوام بالانتساب لطلاب العراق للعام الدراسي الجديد 2024 2025
المقدمة :
نظام الانتساب هو عبارة عن نظام يكدر الطالب من خلاله إكمال السنة الدراسية دون الحاجة إلى الالتزام بالحضور اليومي للمدرسة. يعني الطالب يكون ملزم بأداء الامتحانات الآتية فقط.
. امتحان شهري واحد فقط لتحديد درجة الفصل الاول
. امتحان نصف السنة
. امتحان شهري واحد فقط لتحديد درجة الفصل الثاني
س/ زين شنو الي راح يحدد دخولك للوزاري ؟
ج/ الي راح يحدد دخولك للوزاري هي هاي ال ٣ امتحانات بحيث راح تنجمع درجتهم وتتقسم على عددهم يعني راح تتقسم على 3 ويطلع المعدل السعي السنوي النهائي الي وفقه راح يحدد انت حتدخل للامتحان الوزاري لو لا.
س/ شلون راح يعرف الطالب انو هو راح يفيده الانتساب او لا ؟
ج/ الي راح يحدد هذا النظام راح يفيدك او لا هو التزاماتك وروتينك و مصدرك الدراسي
شلون يعني ؟ يعني اذا انت ما ملتزم بخصوصي ولا عندك التزامات معينة ف هنا انت تحتاج امتحانات والتزام الي راح توفره الك المدرسة اما اذا انت لا والله مسجل خصوصي ومعاهد وما تكدر توازن بين المدرسة والمعهد ف هنا انت تختار هذا النظام لكن سواء جنت طالب معتمد على الخصوصي او اليوتيوب لازم قبل ما تقرر القرار الي راح تتخذه لازم تعرف شنو ايجابيات وشنو سلبيات هذا النظام.
الايجابيات للدوام بالانتساب
1. الوقت : نظام الانتساب حيخلى الطالب قادر على إدارة وقته بشكل أفضل يعني راح يكون وقته كله اله وللدرس.
2. توفير التكاليف يقلل من التكاليف المتعلقة بالنقل والمستلزمات المدرسية.
3. مناسب للحالات الخاصة : يُعتبر خيارا جيدا للطلاب الي يعانون من مشاكل صعبة أو ظروف عائلية خاصة تمنعهم من الحضور اليومي للمدرسة.
4. الاعتماد على الذات: يُعزز مهارات الطالب انو يعتمد على نفسه ويمتحن نفسه ويكون منضبط يعلمه شلون يعرف يلتزم وغيرها . اما اذا جان الطالب يعرف نفسه ما راح يلتزم وصعب يضبط تفسه ف هنا ما انصحه بالانتساب
السلبيات للدوام بالانتساب
1. قلة التفاعل : يعني مراح يكون من يقرا اكو تفاعل مباشر مع المدرسين والزملاء، ف هالشي ممكن يؤدي إلى نقص في الفهم العميق للمواد وايضاً ممكن يقل حافز الطالب
2. قلة الأنشطة العملية: يعتمد نظام الانتساب بشكل أساسي على الطالب وحده وبالتالي ممكن الطالب حتروح عليه فرصة المشاركة في الامتحانات اليومية ف هالشي راح يأثر بشكل سلبي عليهم
3. ضعف في التحفيز : ممكن تحس بالملل أو قلة الحافز بسبب عدم وجود بيئة دراسية يومية وزملاء خاصة اذا انت من الطلاب الي ما متعود تقرا وحدك وتمل بسرعة وتتخاذل
4. الصعوبات الأكاديمية : في حالة عدم وجود دعم كاف، قد يواجه الطلاب صعوبة في متابعة المناهج وحل المشكلات الدراسية بأنفسهم يعني اذا واجهك صعوبة بفد مسأله حتضطر تبحث الاجابة بنفسك
الخلاصة :
هذا النظام حيفيد طالب ويضر طالب ليش ؟ لان هذا الشي يختلف حسب طبيعة الطالب يعني : اذا جان الطالب يكدر يلتزم ويعرف مصلحة نفسه وين وعنده دورات خصوصية ومتابعة وامتحانات و تقرا اول بأول بدون تراكم ف هنا المدرسة مراح تضيفلك شي لان انت بالاساس جاي تمتحن مع اساتذتك ومتابع معهم اول بأول ف هنا يكدر الطالب يسوي انتساب اما اذا جان الطالب غير ملتزم و يسخت دائماً وما عنده السيطرة على نفسه انو يضبطها بامتحانات ويحب يكون اكو دائماً وياه خطوة بخطوة يكله اقرا ، حضر ، امتحن وغيرها ف هنا المدرسة راح تفيدك ولا تسووي انتساب واذا انت ما مسجل خصوصي ومعتمد على اليوتيوب كذلك ابقى بالمدرسة لان الامتحانات راح تفيدك لان انت كطالب سادس اكثر شي يخدمك بهاي المرحلة هي الامتحانات
مصدر الدراسة بقلم الدكتور هيثم وسام
رابط
رد مع اقتباس
المشاركة الأصلية كتبت بواسطة Aya'
