هنا

[ناصر اسماعيل الموزاني]

{ياسياب شحچيلك}
.....
بخيالي مر نجم
شايل ألم وعتاب
چن آنا بحلم
چني فتحت أكتاب
ردّت أقرأ...
طلعلي من السطر
بوراقه السياب
سألني:-
عن نهر جيكور
عن الماي
عن الهور
گلي:-
أشبيها البصره...
مغبره أتراب
لابيها خضار الگاع
لا شط العرب..
شايل حلمها أشراع
وشبيه الوطن وشصار
حزنانين كل أهله
وشبيه النخل..
حزنان يم دجله
شفت النخل
شفت بظهره الف أصواب
شفت الناب فوگ الناب
ياسياب شحچيلك
تراها أتعددت لسباب
@@@@@
ياسياب....
ياسياب
موبس النخل مذبوح
راحت بالوطن چم روح
وشچم روح...؟
هاي ذياب
مارحمت زغير وشاب
قصصنا أهواي ياسياب
كل قصه وراها أصواب
ياسياب...
صرنا من الحزن
مو أحنا ناس أغراب
جر حسره...
وبچه السياب
تمتم...
گال:-
مدري شگال
وسالني عن زمان الفات
عن أيامه الحلوات
گال:-
أفلان..وين أفلان
الضميره من ذهب
ماباعه وكت العوز
ولا مال وي ميلت ريح
مثل خيط الشمس
من ينگطع ميطيح
ووَين ..ووَين
لاحنة رسم
كحلت چف الايد
ولا شمعت حلم...
شفت بصواني العيد
لا شالت طفل..
ليفوگ مرجاحه
ولاناس الوطن
بالوطن مرتاحه
لادبكه شفت...
لادگت أدفوف
ولا نهر الفرح...
شايله مشحوف
ياسياب شحچيلك
تراها أتعددت لسباب
خل الاسأله
أرجوك ياسياب
وبفجأه أنكطع....
عني الخيال وغاب
لأن رن الجرس ع الباب
فزيت...؟
ولگيته رايح السياب
بس أوراقه موجودات
صارن بالخيال أكتاب
صارن بالخيال أكتاب
@@@@@
...
كلمات
ناصر اسماعيل الموزاني

[Civil Engineera]

سلمت اناملك
ودامت قلمك المبدع
شكرااااااااا.

[حسن الامير]

[نوارس الياسري]

كلمات رائعة جدا فعلا ابداع يارب التوفيق الك سلمت اناملك

[الرياحين]

كلمات رائعه هيه اكبر من ان تصفها احرفي المتواضعه دام ابداعك

[طائر الحب]

شهادتي مجروحه بكل ابيات القصيده / عاشت الايادي