هنا

[أمير الأحلام]

تجربتي اللي اريد احجيها هي خليط من عدة مشاعر وعدة مواقف جاي امر بيها بنفس الوقت، حبيت اشاركها وياكم لأن محتاج احجي ومحتاج اللي يسمعني.
انا حالياً بالغربة وحدي ببيروت، واكيد تعرفون باللي صار خلال هاي اليومين ببيروت.
الاسعافات ضلت تركع والجرحى ترسوا المستشفيات، لا زال الوضع هنا متأزم وما مستقر لكن الحمد لله.
احنه بالعراق شايفين حروب ومتعودين عليها.
بس اللي صار وانا بهاي المعمعه عدة امور نفسية التمت علي:
أولاً: بنفس الوقت اللي جنت اسمع صوت الاسعافات تنقل الجرحى ع المستشفى اللي يم بيتي خابرت امي. (امي بيها جلطة وعلى اثرها انشلت ما تكدر تمشي) خابرتها وعرفت اخواني طالعين من البيت وعايفيها لوحدها محد باقي يمها. اخواني ما يحملون المسؤولية.
انا ما اكدر اجيبها يمي وضعي ما يسمح ولا اكدر ارجع يمها اداريها. ما اكدر اوصفلكم شعوري بذاك اليوم وصوت الاسعافات يمي تنقل الجرحى وامي تكلي عايفيني لوحدي بالبيت.
وبعد شوية خابرت خالتي، هي مربيتني وبمقام امي الثانية، جانت يمي هنا بلبنان بس اضطرت ترجع للعراق (هي عدها اكتئاب مرضي من عشرين سنه ليهسه وتاخذله ادوية) عرفت انو حالتها متدهورة والاكتئاب مسيطر عليها وانا بعيد ما اكدر اسويلها شي.
والشغله الاخيرة: اكتشفت اني ما عندي اصدقاء او بالأحرى اصدقائي واقاربي كلهم مزيفين، رغم اللي جاي يصير بلبنان محد اتصل ولا احد سأل لا من أصدقائي ولا من أقاربي بس شخص واحد من بين كل اللي اعرفهم وكل اللي واكف وياهم وعلى اساس مسوين روحهم خواني

ملخص شعوري هو الوحدة ومواجهة الحياة لوحدي: الناس اللي اعتبرهم عائلتي واهلي همه امي وخالتي واثنينهم مرضى لا اكدر اروحلهم ولا يكدرون يجوني.
اصدقائي واقاربي اغلبهم ما يريدولي الخير اصلا.
وما اكدر اتزوج واكون اسرة حالياً لأسباب معقدة شرحها طويل

اعرف ماكو شي ممكن ينكال بس مجرد حبيت اشارككم شعوري اللي امر بي بهاي الفترة.

[مہحہمہؤُد آلَعہرآقہي]

الله يكون بعونك بس لازم تكافح لأجل العمل والأسرة بنفس الوقت لانه مرارة الغربة أحياناً تجعل من الإنسان محبط نوعاً ما لكن بالعزيمة والإرادة القوية تكسر كل حاجز العثرات أمامك

واتمنى لك كل الخير وأسأل الله أن يوفقك بعملك ويحفظ لك والدتك ويبعد عنكم كل سوء

[عبير الياسمين]

مع اﻻسف الوضع بلبنان صعب ايضا وغير مستقر , وهذا يجوز اثر على نفسيتك اكثر , اما عن اخوانك فيا اخي العزيز اكيد انت ما تتوقع ان اخوانك يقابلون والدتك 24 ساعة اكيد طلعوا من البيت لفترة مؤقتة ما اعتقد راح يتأخرون عن والدتك هواية ,يعني بين فترة وفترة ﻻزم يطلعون يروحون يقضون اشغالهم او يرفهون عن نفسهم شوية ترى هذا شي طبيعي ,
اما اﻻصدقاء , يااخي العزيز اكثر الناس بالغربة تعاني من هذه الناحية , الصداقة الحقيقية صعب تلقيها بالغربة , اما اذا كان اصدقائك مدة يسألون عليك من فترة طويلة ﻻ تعتب عليهم الناس كل واحد ملتهي بقهرة وبمشاكلة ماكو احد مرتاح بالدنيا ,
اما قولك عن ان اقربائك ما يريدولك الخير , ابعد هاي اﻻفكار عن دماغك .واذا دتشتغل اهتم بعملك واذا دتدرس اهتم بدروسك او اشغل نفسك بأي شيء اخر اتمنى لك راحة البال والتوفيق في حياتك .