يـخو خدري من اشوفن رايتك يمي
وحگ عينك تحسسني بحنان امي
العمر خلصت ماصايح علي بـ اسمي
اغاتي تگلي وام عون بخجل ومدنگ العيون
لـ جرح گلبي دوه ...العمر خلص سوه
العمر خلص سوه...العمر خلص سوه
..............................................
اجيتك حرمة مهضومه الوكت ضكني
متعوده اعله طولك لا تفاركني
ندهتك ماكمت هاي الي هضمتني
يالتتونس اعله الموت خياله الخيمنه تفوت؟!!
جي طاح اللوه.......العمر خلص سوه
العمر خلص سوه...العمر خلص سوه
..............................................
يبو خوة مثل شو ضاعت الخوه
عجوز انا واجيتك للنهر گوه
ولا جني اعله راسك يابو المروه
منك ايست رديت رجعت للهيمه مامش بيت
بيت العز هوى!! ...العمر خلص سوه
العمر خلص سوه...العمر خلص سوه
..............................................
اجيتك للشريعه ها يالمعتبر
اريد انعى اعله طولك والزلم تفتر
الوذ بحسرتي وبدمعتي اتوزر
انا شوية وگمت عنك خفت لا انشتم يمك
الحجي وزودي الضوه ...العمر خلص سوه
العمر خلص سوه...العمر خلص سوه
..............................................
يـ ظل طولي السوالف خلصن كلهن
بنات الزهره ضلن زلم ماعدهن
من يمك شمر بالگوه ياخذهن
سولف شيبت رمشي! !!
احجيلك كلمه خلي امشي
يالـ اغلا من الهوى ...العمر خلص سوه
العمر خلص سوه...العمر خلص سوه
..............................................
الملا: سيد فاقد الموسوي
اسم القصيدة: اجيتك حرمه
رد مع اقتباس