هنا

[صقر عراقي]

في منطقتنا .قريتنا محلتنا مانطبخ البانية والدجاج معا . يعني مركة دجاج وباميا سوى .
وفي مرة وبالصدفة صار غداي مع عائلة عربية
قدموا لي تمن .. رز .. مع مركة باميا ودجاج .
بالبداية تراجعت بس مابينت نفسي متقهقر من امامها . كأن الاكلة غريبة عليه . استحيت وتجرأت وكلتها
مامتعود عليها .حسبالي بنتهم ماتعرف تطبخ وسوتها عليك يالله .
ولما اكلت .طلعت الاكلة طيبة وراقية جدا .
انتهت القصة وخلصت السالفة لما وصلت الى اهلي قصيت الحكاية .
حكاية المركة.. اهلي هم تعجبوا اشلون اتصير باميا ودجاج سوى .؟
يوم من الايام سوتها وحده من نسوانه .طلعت المركة اصلية وطيبة واشتهرت الاكة بالمنطقة من ذاك اليوم الى هذة الساعة .
هاي بسيطة
اتعجبت اكثر لما اكلت في مكان مركة سمج وباميا حتى ماسولفتها الى اهلي لان كلش صعبة بنظري وخاف مايصدكوني .؟
هاي عدنا بالعراق .
احنه العرب بينه لوثة من الملوك والسلاطين دائما نشعر بأن الاجانب متفوقين علينا بكل شيء حتى بالاكل .
دار الزمان عجلته وخطت شارباي وسافرت للاجانب .
وبالصدفة دخلت الى مطعم يحلف عليه الواحد شكله ارقى من قصر رئيس جمهوريتنا .
كعدت مع المترجم وقدموا (المنيو)قائمة الطعام وعدد الاشكال والارناك الارناك اعتقد معناها انواع بس معفسه وع السرعة
قلبوها ارناكَ المهم .
طلع المطعم صيني
الطعام .
ضفادع .. عكاريك
عقارب .عكرب
افاعي .حياية .
اضافة الى صور لمخلوقات بحرية لاسامع ولاشايف مثلهم ولااشوف ولااسمع بهم الا بالمطاعم الصينية الراقية الدرجة الاولى
ولما مررت على انواع الاكل المذكور على القائمة راسا تذكرت تلك الايام وتلك الافكار اتجاه مركة الباميا والدجاج والسمك والباميا
فقلت في نفسي صحيح هم ارقى من عندنا بالجام والشارع والتبليط بس مواجمل ولاافضل منا بالاكل والذوق والدقة بالاختيار من الحيوانات المباحة لنا .
ومن نص تلك الافكار فقلت للمترجم
استاذ اتذكرت انا الدكتور منعني من تناول الدهون اريد مشويات او بس خبز فارغ
اشو صفك بأيده ومدري شنو تكلم مع العامل والعامل راح ميّة باللوفة
وجاء ابسرعته جايبلي يربوع شوي .يرضيني ويعوضني عن الدهونات
هاولك انوخذنا .
ماطوللكم اليربوع اقصد السالفة .
كلت للمترجم واجيته بعذر .؟
اكبر عذر كان شرعي ومفيد في تلك الاثناء ومااعتقد بيه حرام .
قلت له ماتجيبلي وياه بطل ويسكي حتى اخذهم سفري واكل واشرب بالبيت اكثر رومانسية
ونجحت الفكرة لفّوهم الي وطلعت
وسلام الله ع الزوري والباميا والباجة والمسموطة وكل مايتعلق بالدجاج وبما يسبح داخل نهر بالفرات .؟
سلام الله عليك ياعراق

[Haidar Iraq]

ما كو اطيب من اكلنه ..
اني اموت على التوله ..
احس بيها اتلين المعده ..

حياك الله اخ صقر ..

[Suzana]

دا اتخيل باميا على سمج لو دجاج
بس مهما تكون احسن من الجربوع ماادري شنوو
انت المفروض بيك يكون شرطك بالاكل او بالعزومات مطعم عربي والا بلاه هاللعبان نفس..

[وَدعت جرحك]

ههههههه لا يالحمزه ليش طبيتله يمعود هذوله اكلاتهم تسوي حاله نفسيه بالواحد
هسه ماكلتلنه وين صفه الوكت بالبطل والضب المشوي
و يبقى الاكل العراقي حتلو طماطة بالدهن اشهى من الاكلات الاجنبيه
شايف اني من اكلي الطماطه لازم احركهه حته تزداد رغبتي بيها

[صقر عراقي]

ما كو اطيب من اكلنه ..
اني اموت على التوله ..
احس بيها اتلين المعده ..

حياك الله اخ صقر ..

التولة
ايكلك الارض الذي خلق منها الانسان كانت على مساحة
مغطاة بالتولة
ولهذا من يكتفي الواحد بالتولة كوجبة يبقى رشيق وقوي ويعمر طويلا .
فالتولة تمتص الدهون وتنطي الانسان امتداد من القوة والرشاقة .
بالعافية عليك بس موتاكل تولة وتخلط وياها شيء ثاني .؟
بس تولة وخبز .؟ ترجع شباب اذا سويتها وجبة على طول فصلها .؟

[صقر عراقي]

دا اتخيل باميا على سمج لو دجاج
بس مهما تكون احسن من الجربوع ماادري شنوو
انت المفروض بيك يكون شرطك بالاكل او بالعزومات مطعم عربي والا بلاه هاللعبان نفس..

انا اكلت الباميا وسمج فرش مرة وحده بحياتي
بس مع المسموطة
الله وكيلج حتى بالخارج جاي نعتبرها اكبر واجمل وجبة يعني نحتفل يوم اللي نجمع سمج يابس وباميا يابسة ونطبخهم معا
الله واكبر المركة شنو طعمها . احلف المرة . واكد عليها كثري بالمركة والنومي بصرة
طبعا هاي المواد الجافة نلكاها بمحلات الهنود والصين والفيتنام .بالبلاد اللي نعتقد هم اكثر تطور منا .
سوزان جربيها مرة وحده وبركبتي انا خسار اذا طلعت موزينة
بعد ماتعوفينها بس راعي البهارات لازم اسال المرة وانطيج الوصفة خاصتا ايام البرد وتكون وجبة غداء وخبز معمل
انا اخو زناد مطكَت باجر ان شاءالله عليها مسموطة والجاي مخدر .
حيدر تعال انت وسوزان معزومين على مسموطة ابنبراسكة .اقصد بقرية ام الجماجم .؟

[صقر عراقي]

ههههههه لا يالحمزه ليش طبيتله يمعود هذوله اكلاتهم تسوي حاله نفسيه بالواحد
هسه ماكلتلنه وين صفه الوكت بالبطل والضب المشوي
و يبقى الاكل العراقي حتلو طماطة بالدهن اشهى من الاكلات الاجنبيه
شايف اني من اكلي الطماطه لازم احركهه حته تزداد رغبتي بيها

اخذتهم واشكرت بشكل واضح للعاملين كانوا ببلاش بالنسبة الي
ولما طلعت وامنت على نفسي ماكو واحد يشوفني رميتهم بالحاوية مال الشارع الزبالة
ابشرفك ادخل يربوع مدري شنهو ابشقتي ايصير طويل ومربع ومحشيه الله اعلم اشك يمكن لوصراصير لو جراد شفته بنظرة خاطفة
اثناء اللف . بس مامتأكد بالضبط شنهو من زاحف .؟
رحت اشتريت بيزا جيز والحمد لله .؟

[كرزاية]

عافيات
ذكرت بيبتي الله يرحمها
سولفلي امي عليها دكول جانت شتطبخ مركة شجر دكول هذا اكل ملوك
دكله امي الملوك عايفين لحم الغزال والقوزي وياكلون مركة شجر

[الرميثي]

اخ صقر انتة ايضا ملام بهذا الدخول للمطعم
كان من الاول ان تختار مطعم عربي
وبعدين الاجانب ايضا يحترمون الذي يقول لهم
نحن مسلمون ولا نأكل او نشرب هذا المشروب
فماكو داعي تطلب ويسكي مع جربوع
كان بأمكانك ان تطلب اي اكلة خالية من اللحم
وتمشي الامور طبيعية
------------------
عندي ابن عمي مهندس اجهزة طبية
ومقيم في المانيا
يقول لي عندما نجلس في مقهى جميعا
هم يطلبون مشروب بس ما يطلبون لي لانه يعرفون
اننا مسلمون ولا نشرب الويسكي

[Suzana]

يمكن كان خجول بيومها فطلب ويسكي