الرعنة
بقلمي عبير الياسمين
صديقتي حجتلي عن بنت عمها اسماء , تقول هي رغم انها خوش بنية بس كانت رعنة تجاوب بدون ما تفكر وتهوس وتتعارك على امور بسيطة متسرعة حتى بقرارتها المهمة , و ما تفكر ابدا بنتيجة تسرعها ,خبصة بكل شيء,قالت ـ هاي متزوجة ابن عمنا الثاني محمد وهو كلش خوش ولد وهاديء بعكسها , المهم صارت بينهم مشاكل جلبت بي
(طلقني , طلقني !)
طبعا هواية من النسوان اول ما تصير مشكلة بينها وبين زوجها , راسا تقوم تبجي وتتعارك وتقول له طلقني ! هسة اذا طلقها تقلب الدنيا عليه وتقول هذا خاين وما صدق طلبت الطلاق رأسا طلقني يريد يخلص مني ويتزوج وحدة ثانية ,اي زين ! يا بنت الحلال ! انت دتتعاركين ويا وتقوليلة طلقني ! طلقج ابتلى ما طلقج هم ابتلى شيسوي الرجال لعد ؟وبعدين الوحدة بيهن تتندم وتريد ترجع لرجلها وبشروط اسوء من السابق ,
محمد كان ما يريد يطلق مرتة, اولا هي بنت عمه, ثانيا يطلقها هاي وين تروح هي والجهال ؟ اذا راحت ببيت اهلها اخوانها ونسوانهم وجهالهم هناك واكيد لا هية ولا الجهال ما راح يرتاحون وراح يتبهذلون,
اخير شي قللهة ؛ اذا تريدين؛ روحي لبيت اهلج ابقي شهر شهرين اكثر, راجعي نفسج , وراها اذا تريدين تطلقين اني اطلقج زين يابة ؟ قالت زين !
اني راح اجي كل اسبوع اخذ الجهال اطلعهم اشتريلهم الغراض اللي يريدوها, افررهم وارجعهم يمج بفلان ساعة ميخالف , ردت اي,
كل اسبوع محمد كان ياخذ الجهال ويوديهم يونسهم ويرجعهم بنفس الساعة , ماعدا يوم تأخروا بالرجعة !
كان ذاك الوقت بعد السقوط بعض المناطق بيها راح اقول, مثل مراكز حراسة , هي شافت هذولة تاخروا روحي ركض للمركز وابجي وعيطي وصيحي الحكوني الحكوني !!رجلي خطف جهالي !اول شي جماعتنا قايلين الها ؛ هاي مشاكل بينك وبين زوجك احنا ما نتتدخل معلينا,
هاي بقت تعيط وتبجي وتصيح الى ان جاي المسؤول عن الفرقة , سائلهم هاي شبيهة قايليلة هاي عندها مشكلة ويا زوجها واحنا ما نريد نتدخل .
قاللهم معودين روحوا وياها شوفوا شنو القصة كاعدة تبجي وتعيط هسة المحلة عبالهم دنسويلها فد شي دنعذبها !
قايمين اثنين من المجندين رايحين وياها للبيت ورا ما دقوا الباب طلع محمد
ـ سألو انت فلان
ـ قال اي ,
ـ مرتك تقول انت خاطف الجهال
ـ محمد قايل ليش اخطف جهالي هياتهم جوا رادوا يلعبون بلعبهم الباقية هنانة واني جبتهم شوية اتاخرنا ساعة على امهم خللي اصيحهم انتو سألوهم وصايح الجهال ,االجهال قايلين نفس الحجي!طبعا صاحبتنا واقفة تبجي وتولول بدون توقف ,,كللة من عندة صار كم شهر اقوللة طلقني حتى نخلص مدة يقبل شلع قلبي ومدة يطلقني!!!
الشاب المجند اللي اجا وياها مباوع على محمد بعدين مباوع عليهة وراجع مباوع على محمد...
وقال له؛ معود دطلقهة شكو مجلب بيها عاد من حورها دشوف شكلها انت تقدر تلقي الف وحدة بدالها .
صاحبتنا ورا ها الحجاية اخرست ما طلع منها صوت ووجها صار اصفر من القهر ومحمد لازم نفسة بالقوة حتى ما يضحك , قامت اخذت جهالها وراحت ,
والنتيجة مثل ما تشوفون و في كل الاحوال الرجل يدعم اخيه الرجل ضد المرأة في وقت الشدائد .
بقلمي عبير الياسمين
رد مع اقتباس
المشاركة الأصلية كتبت بواسطة mr.rona
